וועט זיך "די צייטונג" רוקן מער צו רעכטס?

די שטימונג אין די היימישע גאס (און בכלל אין אמעריקע) האט זיך אין די לעצטיגע יארן גערוקט מער צו די קאנסערוואטיווע רעכטע ליניע, הויפטזעכליך קען מען דאס זען ביי די יונגעלייטלעך וואס זיצן און הערן אויס טעגליך די טאק שויס פון דעם דעמאגאג ראש לימבוי, און דעם זיבעלע שאן הענעטי, (און נאכדעם טייטשט עס ד.ש. איבער פאר דער בלאט...) און מען ווערט אנגעפיקעוועט פון זייערע העצעס קעגן די ליב'ס (ווי זיי רופן אן די ליבעראלע) און נאכדעם קומט מען אין ביהמ"ד רעדן אויף די דעמאקראטן אז זיי זענען שולדיג אין אלעם (למשל אין דעם וואס דער איראקער קריג גייט נישט ווי געפלאנט...)

זייער פיל היימישע אידן ווילן אבער נישט וויסן אז מיר זענען מער אנגעוויזן אויף די דעמאקראטישע פארטיי צוליב אונזערע קלעביגע הענט, וואס ווילן ווי מער אויסזויגען פון די רעגירונגס קאסע, איך מאך חלילה נישט אוועק דאס אז דער היימישער עולם ברויך דאס האבן, אבער פארוואס שרייסטו אז דו ביסט א רעפובליקאנער ווען דו ווילסט אז די רעגירונג זאל טיילן ווי מער, און די רעפובליקענס זענען די וואס פארשליסן די רעגירונגס קוועלער?

אלנפאלס, נישט דאס איז וואס איך וויל דא מיט דעם אשכול, איך וויל זיך נאר אפשטעלן אויף א אינטערעסאנטע זאך וואס איך האב לעצטנס באמערקט, און וואס איז געווען דער שמועס פון טאג, נאר דא אויף הייד פארק האב איך נאכנישט געזען מען זאל רעדן דערפון.

********************************

דער איד איז אלעמאל געווען א רעכטע צייטונג, די צייטונג פון די אנדערע זייט איז געווען אן אויסגעשפראכענער לינקער בלעטל וואס האט געשפיגן מיט ליבעראלע מיינונגען ווי נאר מעגליך, דער בלאט איז קודם געווען פרא-דעמאקראטיש, און לעצטנס זענען אריינגעקומען אין די רעדאקציע טעלעפאן קאלס פון הענעטייזט חברה אז מען זאל אביסל געבן אויך פאר זייער פארטיי, האט מען אריינגעשטעלט ארטיקלען פון ד.ש.

אבער ווי עס זאל נישט זיין, האלט זיך אלבערט פרידמאן פעסט און כאטש ער אליין האט שוין כמה פעמים געשריבן אז צייטן האבן זיך געביטן און גאנץ אמעריקע רוקט זיך מער צו רעכטס, קען ער זיך אליינס אבער נישט טוישן, (נו, גיי לערן אן אלטער אל-בער-ט טאנצן...) און קאמפיינט פעסט אקעגן בוש, און ווי ער טרעפט נאר עפעס אן אנקעטע וואס שטעלט פרעזידענט בוש אין א טונקעלער ליכט, וועט ער זיך פרייען דאס ארויפצוברענגען.

די לעצטע פאר וואכן האט זיך געטון דארט בריוו צו די רעדאקציע אז ס'איז א מחי'. אנגעהויבן האט זיך עס אז איינער האט געשיקט א בריוו פול מיט טענות אויף די ליבעראלע מידיא, ווי זיי מאנעוורירן מיט די נייעסן לויט זייער פערזענליכע אנשויאונגען, אנשטאט ווי אמאל האט א צייטונג געהייסן צו זיין א אביעקטיווע אינסטיטוציע, ווייסט מען היינט פונקטליך צו זאגן אויף וועלכע זייט יעדע צייטונג געהערט.

ער האט אויך נישט פארשוינט דעם "נייעס באריכט" און האט אים באוואשן פון אלע זייטן, נאכברענגענדיג ציטאטן פון זיין צייטונג ווי מען זעט אפן אז ער איז א געשוואוירענער ליב, און ווי ווינדערליך האט אים אברהם געגעבן א שיינע לאנגע תשובה (גראדע א מעלה וואס ער האט אז ער ענטפערט יעדן זייער שיין) און ער לייקנט בכלל נישט אז ער געהערט צו די דעמאקראטישע זייט.

בלייבט נאר איבער צו זען אויב גייט ער זיך "אביסעלע" טוישן, אדער זיך אנפייפן אין די נאכפאלגענדע בריוו וואס שטראמען אריין צו די רעדאקציע וואס פארלאנגען אז מען זאל אויך מיטטיילן א ארטיקל "וואס אנדערע זאגן"...