תגובות אויף כל העולם כולו.
איך האב דורכגעליינט דעם גאנצן אשכול, און איך וויל אביסל אפענטפערן פאר די אריינמישערס, וואס זיצן זיך באקוועם אין שיינע רחבות'דיגע דירות, און האבן נישט קיין דאגה אז מען גייט זיי ארויסווארפן, און זיי קענען זיך אננעמען פאר דעם רשעות פון ארויסווארפן א אידישע משפחה פון זייער שטוב.
איך מיין נישט חלילה אנצוגרייפן פערזענליך די חשוב'ע שרייבערס וועמען איך רעספעקטיר זייער שטארק, אבער איך מיין אז מען האט אנגענומען דעם נישט ריכטיגן צוגאנג צו די גאנצע זאך, און מען דארף דאס אפענטפערן.
ארענדאר שרייבט:
1) איך האף אז ר' אלימלך וועט האבן א פולן נצחון אין די אלע משוגעים און זיי ארויסזען פון שטעטל.
2) ער זאל קענען פירן דעם שטעטל אזוי ווי זיין הייליגער טאטע וויל אז ער זאל עס פירן.
3) אידן מיט "ברייטע ביבער היטן" און "בערד און פיאות ביז צו די פיס" און "שווארצע ברילן".
ר' אלימלך איז נישט דער ערשטער וואס האט געוואלט האבן א "פולן נצחון" און ארויס זען אידן פון זייער שטעטל, אדער לענדל.
טארקוועמאדא, האט אנגעפירט א גאנצע אינקוויזיציע אין שפאניע ארויסצעווארפן אידן פון זייערע הייזער ווייל זיי האבן זיך נישט "אונטערגעווארפן" די קריסטליכע רעליגיע.
לייג נישט אן די אלע רשעות אויף זיין הייליגן טאטן.
זיי רעאליסטיש, ר' אלימלך וועט די אלע אידן נישט קענען אויספירן צו שיקן קיין "עזאזאל" ווייל לויט ווי איך פארשטיי איז קאנאדא א דעמאקראטיש לאנד, און דער פראנצויזישער ריכטער האט פונקט אזוי ליב ר' אלימלך מיט זיינע מענטשן ווי די "ברייטע ביבער היטן מיט פיאות ביז צו די פיס". און פונקט ווי ער פארשיקט נישט ר' אלימלך קיין "עזאזאל" כאטש ער גייט אויך מיט א "ברייטן ביבער היט" מיט "פיאות ביז די פיס". און זיינע קינדער גייען נישט אנגעטאן ווי די גוי'אישע קינדער, זיי רעדן נישט ענגליש אדער פראנצויזיש, וועט ער אויך נישט לאזן פארשיקן די אנדערע אידן.
ביבער שרייבט
דעס זענען די זעלבע קראנקע בני יואל וואס מען האט פארשיקט פון מאנרא...
א יישר כחכם פאר די אינפארמאציע, איך האב קיינמאל נישט געוואוסט אז די בני יואל זענען שוין נישט אין מאנרא.
האק דיר ארויס פון קאפ אז מען קען "פארשיקן", עס איז נישטא אזא זאך אויף די וועלט, מען קען בויען א נייע שטעטל און זיכער מאכן בשעת מען בויעט נישט אריינצונעמען וועמען מען וויל, אבער די מינוט וואס איינער וואוינט אויף א פלאץ קען מען איך נישט פארשיקן.
מענטשן האבן א טעות און ווילן קאפירן "קרית סקווירא" אז דארט האט מען פארשיקט מענטשן, ס'איז שתי תשובות בדבר, קודם כל איז בימים ההם סקווירא געווען א פיצל פלאץ, און ס'האט טאקע אויך געקאסט א פרייז, אבער ס'איז געלונגען, היינט איז א צווייטע וועלט, אויב זאל חלילה פאסירן א מחלוקה צווישן די סקווירא קינדער וועט מען קיינעם נישט קענען פארשיקן, אדרבא קוקט דורך די מאפע און צייגט מיר אן וואו מ'האט היינטיגע צייטן פארשיקט מענטשן מיט געוואלד?
עס איז צענדליגער חרד'ישע פלעצער אויף די וועלט ווי דער רוב וויל "פטור ווערן" פון א מיעוט, און ס'איז פשוט נישט מעגליך, ס'איז דא לענדער וואס ווילן פטור ווערן פון מינאריטעטן און זיי קענען פשוט נישט. דער חילוק איז אז אין דיקטאטורישע רעזשימען פירט מען מלחמות מיט די מינאריטעטן און דער גאנצער פאלק ליידט דערפון, מען וואקסט אויף מיט שנאה די קינדער זענען געדעמדזשט פון די אלע מלחמות, און דעמקראטישע לענדער פרובירט מען זיי אריינצונעמען אין בילד, און אזוי האט מנוחה ושלוה.
די בני יואל האט מען נישט "פארשיקט" פון מאנרא, מען האט פשוט אפגעמאכט אז מען קוקט מער נישט אויף זייער זייט און מען גייט זיך בויען אליינס, מען פרובירט זיי צו מאכן אביסל צרות, אבער נישט אזעלכע גרויסע אז זיי זאלן ווערן צעווילדעוועט. און פארשידענע זאכן וואס זענען נוגע דעם עקזיסטענץ פון קרית יואל ארבעט מען אפילו צוזאמען אונטערן טיש.
אמת אז פאר פופציג יאר צוריק וואלט מען געקענט ברוח הקודש קאנטראלירן ווער ס'וואלט היינט געווען געטריי פאר ר' אלימלך אבער אזוי ווי מען האט עס נישט געטאן און דער טאהשער רבי האט אהינגערופן די אלע אידן וואס וואוינען דארט היינט, קען מען שוין יעצט גארנישט טאן.
מבני_בניו
איז דאך פון די קלוגסטע שרייבערס דא, ער בארעכטיגט נישט דעם גירוש, ער ברענגט נאר ארויס אז די ווידיא איז א שרעקליכע חילול השם, און מיט דעם בין איך הונדערט פראצענט איינשטימוג.
די שאלה איז נאר וועלכע חלק איז די חילול ה', דאס צונעמען די דירה, דאס מוחה זיין, דאס נישט לאזן די מארשאלס אויספירן די ארבעט.
ווען אין וויליאמסבורג נעמען זיך צוזאמען מאסן מענטשן און מען לאזט נישט צונעמען א דירה פון א איד, איז דאס אויך "חילול השם"? קען זיין מען דארף טאקע פרעגן א דעת תורה.
און יעצט צו עבד עברי וואס "מישט זיך נישט אין טאהש".
עס קען טאקע זיין אז "יעדער האפט אז ר' אלימלך וועט ממילא געווינען די מערכה בזכות אביו הקדוש שליט"א ואבותיו הקדושים נ"ע". אבער ר' אלימלך אליין האפט צו געווינען די מערכה "בזכות המשטרה ובית המשפט דמחוז קוויבק". וואס וועלן נעמען די ארימע מענטשן מיט די ברייטע ביבער הוטן און לאנגע פיאות און זיי שיקן אויף עזאזאל, און אנשטאט זיי וועט מען אריינזעצן מענטשן מיט "שטאפענע היטן מיט קורצע פיאות".
טאג און נאכט ביזסטו ביזי מכלומר'שט צו פייטן "מעשה אלמות", אבער דו אליין פארשטייסט אז מען דארף ארויסווארפן אידן אויף די גאס פון זייערע דירות דורך פאליציי, און דאס איז נישט מעשה אלמות...
און להוי ידוע. אז כבר היה לעולמים אזעלכע זאכען זענען שוין פארגעקומן אין יודישע שטעט אין מיטל אלטער צייטן, אז רשעים האבן זיך פארגלוסט אויף יענעמ'ס דירה און זענען געלאפן צום פריץ וועלכער האט ארויס געווארפן מאשקע'ן אויף די גאס מיט זיין ווייב און קינדער.
די מעשה וואס דו ברענגסט פון וויזניץ איז זייער אינטרעסאנט, אבער פאר דיין אינפארמאציע וויל איך אז די זאלסט וויסן אז זייט מען האט איינגעפירט אין וויזניץ בני ברק דעם ענין פון "שונאים ליסטעס" און ווארפן מענטשן, איז שוין אדורך קרוב צו פערציג יאר פול מיט מלחמות, מען האט קיינמאל נישט געהאט קיין מנוחה, עד היום הזה.
משא"כ ביי די קהלות וואס מען מאכט נישט קיין שונאים ליסטעס, מען מאכט שלום מיט'ן מצב אז נישט יעדער מעמבער איז די זעלבע מדריגה חסיד, האט מען במשך די זעלבע צייט געהאט שלום ושלוה, יא ס'איז אסאך מאל שווער אנגעקומען צו ליידן פון עקסטרעמיסן וואס מאכן זיך אין יעדע קהלה, אבער מען האט זיך געביסן די ליפן, אדער זיי נאכגעגעבן אביסל לפי הענין, נישט געגאנגען מיט אן אייזערנע פויסט, און בשכר זאת האט מען גענאסן פון מנוחה ושמחה. מען האט געהאט ווייניגער מענטשן ביים טיש, קלענערע פארענטשעס, אבער בשכר זאת זענען די קינדער געוואקסן אן שנאה און האס.
געשמאק שרייבט:
די זעלבע מטורפים און משוגעים וואס האבן איבערגעקערט דא אין קרית יואל קערן יעצט איבער דארט אין טאהש.
פארגעס אבער נישט צוצושרייבן, אז ווילאנג מען האט זיך געשלאגן מיט בני יואל, זענען זיי געוואקסן און געהאט די וועלטס געלט, מענטשן האבן א געפיל זיך אנצונעמען פאר גע'רודפ'טע און שוואכערע, און די מינוט וואס מען האט זיך אויפגעהערט מיט זיי צו שלאגן, האבן זיי פארלוירן רוב שטיצערס.
עסקן
פארשטייט אויך אז אין 08 קען מען נישט ארויסווארפן אזוי ברוטאל א אידישע משפחה פון זייער דירה, נאר ער שלאגט פאר מען זאל מאכן דעם רשעות קלוג.
דוד46
כ"ק מהר"א שליט"א, האט קיינמאל נישט געהייסן ארויסווארפן א בחור נאקעט פון די מקוה, פארקערט, מען האט שטרענג גע'קנס'ט דעם בחור וואס האט דאס געטאן אויף די אייגענע האנט. עס איז קלאר אז ער וואלט קיינמאל נישט געהייסן ארויסווארפן פרויען מיט קינדער פון זייערע הייזער. והא ראי' מען האט עס קיינמאל נישט געטאן.
איןבעיה:
אן אריינגיין אין קיין ישראלישע פאליטיק, איז דאס גאנצע אויפשטעלן ישובים אין גוש קטיף געווען א עקסטרעמיסטישע מתנחל'ישע זאך, און ווען די רעגירונג האט איינגעזען אז ס'איז נישט מעגליך זיי צו באשיצן פון די אראבערס, האט מען אפגעשפארט די ישובים.
איך וויל נישט מלמד זכות זיין אויף די ציונים, אבער זיי האבן זיך אויפגעפירט אסאך איידעלער און מיט רחמנות ווי די טאהש'ע, זיי האבן צוגעשטעלט פאר די ארויסגעווארפענע נייע דירות מיט געלט, מען האט זיי געגעבן צייט אפאר חדשים זיך צוגרייטן, און מען האט זיי פארזיכערט אז מען האט נישט קיין ברירה און אף על פי כן איז דאס געווען טאקע זייער שווער פאר זיי.
אדרבה קוק וויאזוי מען האט זיי ארויסגעווארפן:
איך פארשטיי פארוואס מען האט זיי געמוזט אוועקנעמען פון דעם מקום סכנה וואס זיי האבן געוואוינט, אבער קוקט אן מיט וואס פאר א ווייטאג מען האט דאס געטאן.
לאמיר טראכטן א מינוט די אלע אידן זענען געקומען וואוינען אין טאהש ווייל טאהשער רבי שליט"א האט זיך געבעטן מען זאל קומען, ער האט געוואלט אויפשטעלן אן ערליך שטעטל פאר אידישע קינדער.
און פארוואס פארטרייבט מען זיי, ווייל זיי גייען מיט "ברייטע ביבער היטן"?.
לעבעדיגער
איך האב קלארע א אגענדע דא, מען זאל נישט ארויסווארפן אידן פון זייערע דירות!
איך האב געזען פאריגע וואך דעם אשכול פון "ס'איז לעבעדיג אין טאהש" איך האב עס אפילו נישט געעפנט, וואס גייט מיך אן אז אין טאהש איז לעבעדיג.
אבער אז איך האב געזען דעם קליפ, וויאזוי דער שטארקער רודפ'ט דעם שוואכן, ביז יעצט ווען זיי האבן זיך געשלאגן מיט לאווען האבן זיי זיך נישט געוואגט צו גיין אזוי ווייט, ווייל זיי האבן פון אים געציטערט, אבער יעצט אז זיי האבן געסעטלט פאר אפאר מיליאן דאלער, האבן זיי זיך גענומען צו אפאר שוואכע ארימעלייט, מוז יעדער צולייגן א פלייצע זיי צו ראטעווען.
און צום שלוס:
זייטס מיך נישט חושד אז איך האב אזוי ליב די "ברייטע ביבער היטן", אדער איך סימפאטיר מיט בני יואל / נטורי קרתא / קאשוי וכו'. איך דאס בעסטע ליב מיין קרייז, וואס גייען אנגעטוען פונקט ווי איך, און זיי האלטן די זעלבע מיינונגען ווי איך, פרומער פון דעם איז שוין עקסטרעם, ווייניגער פון דעם איז שוין מאדערן. אבער נאכדעם קומט גאנץ כלל ישראל, יעדער איד איז מיין ברודער, זאל ער זיין א בעלזער, א סקווערער, א קלויזנבורעגער א וויזניצער, א קאשויער א בני יואל'ניק, א אגודיסט, א מזרחי'סט, און אפילו א ליובאוויטשער משיחיסט, יעדער שומר תורה ומצות, וואס האלט שבת איז מיין ברודער, און איך וויל נישט מען זאל פארגיסן זיין בלוט.
מיינער א גוטער ידיד איז א וואלונטיר אין "גמח הצלה" פון קרית יואל, ער זאגט מיר אז ס'איז מעשים בכל יום וואס מען העלפט ארויס בני יואל אידן, ווען זיי דארפן הילף ענטפערט מען נישט "ווער געהארגערט".
עס מוז זיין גרעניצן וואס דאס טאר מען נישט אריבערגיין, אידן זענען רחמנים בני רחמנים, און
ארויסווארפן א איד פון זיין דירה איז אכזריות!
תוקן על ידי אידישבלוט ב- 13/05/2008 7:46:54
יהודי לא מגרש יהודי!
פאר א שיינעם תגובה.....
