קלארקייט בנוגע די "בית רחל" שולע אין אנטווערפען

קושט דברי אמת

אזוי ווי איך זעה אז דער עולם איז אוועקגעפארן פון די ארגינעלע נושא, וועל איך אי"ה מיך צוריקקערן וואס טוט זיך בנוגע די 'בית רחל' מיידע שולע אין אנטווערפען.
איך גיי דא שרייבן בקוצר אמרים, די אמת לאמיתו, און כ'וועל מיך אי"ה "נישט" צוריקקערן אפענטפערן יעדעם'ס בויך וויי און שטוסים, ודי בזה.

עס איז א דבר ידוע, און א שם דבר בכל מקום אשר דבר המלך, מלכו של עולם, ודתו מגיע, איבער די טייערקייט און הייליגקייט פון די "בית רחל" שולע אין אנטווערפען, און לאמיר מעתיק זיין וואס דער געטרייער מנהל הרה"ח ר' מרדכי שטויבער שליט"א האט געזאגט אום מוצש"ק פ' בשלח ביי א סעודת מלו"מ לטובת דעם בית רחל: "געלויבט השי"ת ס'זענען שוין צוויי דורות נתחנך געווארן, די דורות רוקן זיך, ס'איז א גרויסע ירידת הדורות ליידער אין די גאנצע וועלט, מ'הערט אזעלכע זאכן ליידער ווי מ'האט פריער דערמאנט, אבער ב"ה אונזערע קינדער זענען גארנישט ווייניגער ווי די מאמעס, דער יונגער דור איז גארנישט ווייניגער ווי דאס עלטערע דור, און אפשר אין געוויסע זאכן נאך בעסער. מ'זעהט ב"ה מ'גיבט ארויס פירות וכל רואיהם יכירו כי הם זרע ברך ה'. ס'איז געווען יעצט א חתונה, הרה"ג ר' יצחק אהרן פילאף האט חתונה געמאכט, עס זענען געקומען פון אמעריקע געסט וואס ארבעטן דארט אין חינוך, נשים צדקניות, האבן זיי זיך געוואונדערט און געשטוינט אז דאהי איז נאך ד אזעלכע איידעלע חסיד'ישע מיידלעך.

און נאך פארשידענע זאכן, יעדער ווייסט, אונזערע קינדער, אונזערע מיידלעך, פארן קיין אמעריקע אין קעמפ, ס'זעהט זיך ארויס. מ'קען דערציילן אסאך זאכן, איך וועל נאר דערציילן איין מעשה. אונזער א תלמידה איז געווען אין אמעריקע מיט איר משפחה צוזאמען אין איין הויז, זייער א חסיד'ישע הויז, זיי גייען צעפ, שווארצע שטרימפ. עס איז געווען אין זומער, איין נאכט זענען זיך צוזאמגעקומען אסאך מיידלעך אין א ליידיגע הויז און געשלאפן צוזאמען, האט איינער פון די אמעריקאנער מיידלעך געזאגט פאר די אנדערע מיידלעך, דאס אנטווערפענער מיידל איז עפעס אנדערש ווי אונז. וואס הייסט? מער ערנסטער, אלע האבן זיי מודה געווען. ב"ה מ'רעדט נישט ח"ו פון קיין נישט ערליכע קינדער, אלע ב"ה כולם אהובים כולם ברורים, אבער דאך מוז מען מודה זיין און מ'זעהט אז די חינוך פון בית רחל ב"ה האט א עקסטערע סייעתא דשמיא, א עקסטערע הצלחה, א עקסטערע שמירה עליונה, ווי מ'האט פריער געזאגט.

איך וועל זאגן א זאך. מיר זענען געווען יעצט אין לאנדאן ביי א היימישע שידוך פון איינער מאנ"ש, ס'איז געווען א גרויסע סענזאציע אין לאנדאן, אז א היימישע מיידל האט ברצונה הטוב אנגעטוהן א שפיצל ווען די מאמע גייט נישט א שפיצל. א סענזאציע איז געווען אין לאנדאן, א שמחה אין אלע עולמות. ב"ה דא אין אנטווערפען איז עס נישט קיין סענזאציע. איך ווייס אדרבה, ס'זענען געווען מיידלעך וואס האבן זיך געוואלט אנטוהן שפיצלעך און די טאטע'ס האבן נישט געלאזט. א טאטע האט מיר געזאגט, איך שעהם זיך אפילו עס איבערצוזאגן 'איך וועל עס איר אראפציען אינמיטן די גאס' איז ער געווען אויפגערעגט, ב"ה אז מ'האט זיך אנגעטאן, די קינדער זענען בעסער ווי די עלטערן, ס'איז נישט קיין שום רבותא ווען מ'גייט צניעות'דיג אנגעטאן. איך האב געהאט ביי מיר פאריגע וואך דער רב פון תולדות אהרן שליט"א אינאיינעם מיט זיין זוהן, זאגט ער מיר: "איך האב געזעהן דא אין אנטווערפען צעפ", זאגט ער "צעפ אין אנטווערפען? נאכמער ווי אין חינוך ירושלים! אפי' אין ירושלים איז נישט דא אזוי!". ער איז געווען אינגאנצן ערשטוינט, האב איך דערציילט, ב"ה ס'איז נישט קיין חידוש, נישט קיין רבותא.

איך וועל זאגן נאך שיינער, איך וועל נישט רעדן בגנות פון קיינעם, און איך וויל נישט אנרירן קיין נושאים וואס איז נישט נוגע, איך וויל נאר דא איין זאך זאגן, ס'איז א גרויסע כבוד פאר בית רחל אז מ'האט מגדל געווען אזעלכע ווייבלעך וואס זאגן אז בית רחל איז שוין נישט גענוג גוט, ס'איז א גרויסע כבוד אז מ'האט מחנך געווען אזא פרום דור אז מ'קען שרייען אז בית רחל איז שוין נישט גענוג גוט, געלויבט דער אויבערשטער. מ'האט אמאל געהאלטן פארקערט, אז מ'האט געשריגן, מ'האט אוונז סעקירט אז bullet proof זאקן דארף מען אנטאן דא אין בית רחל, און נאך אזעלכע סארט דיבורים, געלויבט דער אויבערשטער, חסדי ה', השי"ת זאל העלפן ווייטער", עכ"ד פון ר' מרדכי.

און ווער עס האט קרובים פון-אין אנטווערפען קען זיך נאכפרעגן אז דאס איז 100% די ווארהייט, די "בית רחל" שולע שמ'ט אין די גאנצע וועלט, אלס א בית חינוך ווי מען איז מגדל אידישע טעכטער אויפן ריינעם אויסגעטראטענעם דרך כפי שהורה לנו זקן. און מ'קען זיך דאס נאכפרעגן ביי אלע צופרידענע עלטערן, (ליידער אנדערש ווי די ת"ת סאטמאר אין אנטווערפען ווי עס איז ווי א שיף אן קיין רודער, וד"ל).

פרשת ה'סובסידיע'ס

אום תש"מ איז בית רחל געווען אין א שווערע מצב, און מען האט דאן פארהאנדלט אריינצוגיין און באקומען שטאטישע פראגראמען (דאס זעלבע וואס אלע היימישע מוסדות התורה באקומען אין אמעריקע און לאנדאן), דער מנהל ר' מרדכי איז געווען א גרויסער מתנגד דערפון און איז געשטאנען אקעגן מורא האבנדיג אז ס'וועט פאר'גוי'אישן דעם שולע, איז מען דאן אריבערגעפארן צו רביה"ק בעל ברך משה זצ"ל, עס זענען געפארן ר' מרדכי שטויבער ר' יעקב אליעזר טויב און ר' עוזר פריעדמאן, און דער רבי האט געהאלטן אז מ'זאל יא נעמען, נישט נאר ער האט געהאלטן מ'זאל יא נעמען, נאר ער האט געבעטן: "וועסט זעהן ס'וועט נישט שאטן פארן חינוך, פרוביר אויס" האט ער געזאגט. וכן הוה אזוי איז דאן געווארן און ב"ה מ'נעמט ביז היינט די שטאטישע געלטער, וואס עס איז קלאר ווי די טאג שווארץ אויף ווייס אז אן קען דער בית רחל נישט שטיין אפילו אויף אן איינציגער טאג.

למעשה ווען די שטאט האט אנגעהויבן צו פארלאנגען אז מען זאל לערנען געוויסע לימודים, וועלכע עס זענען ליידער נישט כפי רוח התורה ורוח המסורה, האט מען ארויסגענומען די עלטערע קלאסן פון די שטאטישע סובסידיע'ס איז ס'זענען געבליבן נאר דיי יונגערע קלאסן, ווי מען לערנט נאר וואס מען דארף צו לערנען, און די שטאט פארלאנגט נישט ביי זיי צו לערנען וואס מען טאר נישט ח"ו.

מזלמזל גערעכט

זייט מיר מוחל ר' לאעליכם:
אבער איך האב אליינס געהערט פון א תלמידה פון 'בית רחל' אנטווערפן געוויסע געפערליכע זאכן וואס איז דארט פארגעקומען אין די לעצטע  6  יאהר, איך געדענק נישט יעצט פונקטליך וואס איך וועל פראבירן עס צו מברר זיין און עס שרייבן דא, אבער לדעתי דאס אליינס אז כ"ק האדמו"ר מפשעווארסק,  וואס וואינט אין אנטווערפן און איז מסתם גוט באקאנט אין די פרטי הדברים, האט זיך ארויסגעשטעלט אזוי שטארק לטובת 'תורת אמך' אזש ער האט געשיקט זיין איידים ארומפארן נאך געלד פאר דעס דאס שרייט דרשני!

איך וויל מיך אנטשולדיגן פארן עולם, אז רוב וואס מיר האבן ארויפגעלייגט איז אויפגעקומען אין קלענערע אותיות. אויב איינער קען מיר מעלדן וואס טוהן אז ס'זאל מער נישט געשעהן, קען איך עס נאכאמאל ארויפלייגן.

"אעפ"כ רבותי! איך זאג עס נישט קעגן דעם אז מ'זאל נישט ארויסגיין פון די סובסידיעס, איך זאג עס וועגן דעם אז מ'זאל פארשטיין אז ארויסגיין פון די סובסידיעס פאדערט זיך מסירות נפש! און איך פרעג יעצט די שאלה, ווי זענען די בעלי מסירת נפש?!, ווי איז דא נאך א מרדכי שטויבער וואס האט זיך מוסר נפש געווען 30 יאר?! איך בין ארומגעפארן אין די גאנצע וועלט, איך האב מיר מפקיר געווען מיין משפחה, איך האב מיר אליין מפקיר געווען, איך וואלט אויך געקענט זיין אין א כולל, איך וואלט אויך געקענט זאגן א שיעור, איך האב נאך צו יעדע צייט ב"ה אזא גוטע מויל ווי אנדערע אינגעלייט, איך האב מפקיר געווען מיין גוף און מיין נשמה פאר בית רחל. ווען מען האט געבויעט דעם בנין איז געווען איין ווינטער ווען מיין רעביצין תחי' האט געהאט געזונטהייט פראבלעמען, זי איז געפארן, און בסך הכל איין שבת בין איך געווען מיט מיין רעביצין אינאיינעם א גאנצן ווינטער פון ר"ח חשון ביז ר"ח ניסן צוזאמען אין שטוב, איין איינציגן שבת דעם גאנצן ווינטער! אזוי בויעט זיך חינוך!