ווי עס ווייסן מן הסתם אלע, גרייט זיך ר' אהרן צום מארגענדיגן טאג ווען ער וועט אנפירן א מאסן דעמאנסטראציע אין מאנהעטן אנטקעגן די ממשלת הכופרים די ציונים ימ"ש וועלכע גראבן קברים.
לאמיר פרובירן צו דערגרונטעווען אין די היסטאריע פון ר' אהרן זעהן ווען און וואו די ציונים זענען אים געשטאנען אין וועג אזש אז מ'פאררופט אזא פייערדיגע מחאה אויף מארגן.
ר' אהרן, ווי מען ווייסט, האט דאך אויף זיך דעם "פלעק" וויזניץ, וואס איך מיין מיט'ן אונטערשטרייכן די ווארט פלעק איז עפעס וואס מען האט אים אלץ פארגעווארפן, עס איז געווען די שווארצע קאץ וואס האט אים באגלייט, און דאס איז געווען די הויפט סיבה פארוואס סאטמאר איז צוטיילט געווארן תשמ"ה, ווייל אלטע סאטמארער חסידים און רוב איינוואוינער פון קרית יואל האבן נישט געוואלט אלס רב דעם יונגערמאנטשיק, וועלכער איז דער איידעם פונעם וויזניצער רבי'ן נשיא מועצות גדולי התורה, א זאך וואס איז אין סאטמאר חזיר טרייף.
ר' אהרן האט במשך זיינע יארן אלס ראש ישיבה אין קרית יואל אסאך מאל "געלאזט פאלן ווערטער" וועגן די שיטה הק' פון רבי'ן, און וועגן די קנאות און וועגן ספר ויואל משה. עס זענען דא אסאך סטעיטמענטס פון אים וועגן ספר ויואל משה אז עס איז נאר דברי אגדה און נישט להלכה, ער האט אמאל אין ישיבה זיך אויסגעדריקט אז מען קען נישט זאגן אויפ'ן ויואל משה אז עס האט א דין ווי תשובות מהר"ם שיק, עס איז דא פון אים סטעיטמענטס ווי ער לאכט אפ פון מחמירים וואס נעמען נישט אריין ספרים פון מוסדות הרב קוק, די אלע זאכן זענען אין גאנצען נישט אין פלאץ פאר א סאטמאר ראש ישיבה און פאר איינעם וואס וויל זיך רופן סאטמאר רבי.
מען דארף זאגן אז מסתמא איז דאס געווען דער פועל יוצא פון זיין אן איידעם אין וויזניץ, ווייל די שנאה האט אין אים נעבעך געפלאקערט פארוואס די סאטמארער שיטה האט געברענגט ער זאל ווערן אויסגעשפילט פון די געזעלשאפט, און אז זיין חתונה האט שוין געדארפט זיין ליידיג פון מענטשן. כאטש מען האט שוין געהערט קנאים וואס זענען נישט געווען קינדער פון קנאים, און טאקע גרויסע קנאים, לדוגמא ר' שמחה בונם וואלדענבערג ז"ל פון ירושלים, וועמענס פאטער דער ציץ אליעזר איז געווען פון די ווייטערע קרייזן און ר' שמחה בונם איז געווען פון די מוצי"ם אין עדה החרדית און פון די אויסגערופענע קנאים, וועמען עס האט טאקע וויי געטאן ציונות. אבער ר' אהרן איז דאך ווייט פון דעם כרחוק מזרח ממערב.
אין די נו"ן יארן האט מען באשלאסן אז מ'דארף דעם ר' אהרן מאכן פאר וועלטס גרעסטע קנאי. ר' אהרן האט אין יענע יארן אנגעהויבן האלטן זייער היציגע דרשות קעגן ציונות, ער האט אראפגעריסן די מדינה פארוואס מען וויל נישט צוריקגעבן די שטחים ער האט ספעציעל שטארק ליב געהאט צו צולייגן די רעליגיעזע פארטייען, און מסביר זיין די פאליטישע אנטוויקלונגען אין ארץ ישראל, ער פלעגט רעדן שארף קעגן די פרומע, לדוגמא תשמ"ח ביים חנוכת הבית פון בנין ישיבה קטנה "עצי חיים" אין קרית יואל, האט ער זייער שארף אראפגעריסן זיין אייגענעם שווער דעם וויזניצער רבי, פארן אויפנעמען דעם דעמאלסדיגן ראש ממשלה יצחק שמיר שר"י, אינעם גרויסן בית המדרש בקרית וויזניץ און געזינגן פתחו שערים ויבוא גוי צדיק, און איין דרשה חול המועד פסח, האט ער אראפגעריסן די חסידישע קרייזן וואס צייילן ספירה מיט א ברען נאכן סדר אבער גייען צו די בחירות, (ער האט פארגעסן אז אין ארץ ישראל ציילט מען ספירה חול המועד) אין איין דרשה ביי א מלוה מלכה פון איחוד התלמידים האט ער אזוי שיין אראפגעריסן מיט דברי זלזול דעם ערלויער רב שליט"א "א רב אין ארץ ישראל דער מיט די לאנגע בארד, מלא על כל גדותיו", און דער זעלבער צייט אראפגעריסן א ליבאוויטשער זינגער אברהם פריד מיטן נאמען אז ער זינגט לבנימין אמר אויפן דעמאלסדיגער און היינטיגער ראש ממשלה נתניהו שר"י. ער האט זיך אהערגעשטעלט ווי אזא קנאי וואס מען זעט כמעט נישט. לכאורה פון די הייסטע צייטן פון הרב דאמב, ווען ער האט געגאסן פעך און שוועבל קעגן די רבנים פון ארץ ישראל, איז נאכנישט געווען אזא גרויסער פייערדיגער קנאי ווי ר' אהרן איז געווארן אין די נו"ן יארן, אזעלכע דרשות הערט מען מער נישט. ער איז געווארן א מוזג פון רבי'ן זי"ע אויסגעמישט מיט'ן וואידיסלבער רב, פאלטישאנער רב, ר' סענדר דייטש, און ר' הערץ פרענקל, און ענק קענען צושטעלן צו די ליסטע וויפיל נעמען ענק ווילן נאך. על פי רוב האט ער זיך באנוצט מיט אזאלעכע הויכע לשונות פון ר' סענדר'ס לעקסיקאן וואס פאסט מער פאר שרייבערס פון צייטונגען ווי איידער א רב בישראל, און ווען ער האט נאך געהאט א גוטן זשאוק אויף יענעם'ס חשבון האט ער זיך צולאזט א שטייגער ווי דער יארמער רב.
אבער די אלע דרשות האבן נעבעך געהאלפן ווי טויטע באנקעס עס האט נישט געשלאגן קיין עכטע ווארצלען, די קנאים האבן עפעס געשמעקט אז דער ר' אהרן איז נישט קיין קנאי, עס אינטרעסירט אים ציונות ווי א לאך אין קאפ, קנאי'שע מוסדות פון ארץ ישראל וואס זענען אריין צו אים נעמען אין קרית יואל נאך געלט אדער א בריוו האט ער געקענט אפלאכן פון זייער נישט נעמען געלט, מען האט דערשמעקט אז ער נוצט ציונות אלס מיטל וואו מען קען כאפן און לעקן א ביינדל ער זאל שוין ענדליך ווערן וועלקאם אין סאטמאר, אדער אויסנוצען זיין מדות טובות פון אראפרייסן א צווייטן ברשות התורה, און זיך נאך מתכבד זיין בקלנום, יעדער האט פארשטאנען אז ער מיינט עס נישט בכלל וואס ער זאגט, און ממילא האט עס נישט געלאזט קיין שום השפעה.
ר' אהרן איז געבליבן מיטן אימעידזש אז די מערכה מיט ציוניזים גייט אים גענצליך נישט אן, און די פאר מאל וואס מ'האט שוין יא געהערט פון אים א ווארט איז דאס געווען א פאליטישע סטראטעגיע פון זיינע יועצים פאר א צורך השעה, הפעם איז דאס פארדעקן דאס נישט אונטערשרייבן שטרי בירורין צו גיין צו דין תורה ארום דעם בני ברק'ער סכסוך. דאס איז ארום ר' אהרן'ס היסטאריע אין די מערכה מיט ציונים.
נאך א פונקט מוז דא געמערקט ווערן, די התאחדות הרבנים איז אן ארגאניזאציע וואס דארף פונקט אזוי דעם סאטמערען רבין שליט"א ווי ר' אהרן. זיי מוזן אנקומען צו ביידע פאר יעדע זאך. אבער זיי האבן זיך אנגעשטויסן אין ר' אהרן'ס בעבישקייט און ער האט אויפגעהערט זיך צו באטייליגען ביי אסיפות ווייל דער ברודער וועט אויך דארט זיין, ער האט אויף געהערט אונטערשרייבען אויף זייער קול קורא'ס, אבער מער פון אלעם, ער האט אויף געהערט צו שטיצען זייערע פראטעסט רופן. ער און זיינע מענטשען קומען מער נישט צו קיין איין פראטעסט וואס התאה"ר פארופט ווייל אויף דער ברודער און זיינע מענטשן וועלען דארט זיין. נאכמער, ביי די פראטעסטען וועט זיך ארויס ווייזען אז דער ברודער מיט זיינע מענטשען וועלען זיין די גרעסערע און וויכטיגערער טייל, ווייל דער עולם פון יענע זייט סאטמאר זענען די אמתע קנאים און עסקנים.
אפילו ווען דער ירושלימער רב, האט פאר א צייט צוריק אים פערזענליך גערופען אז עס איז וויכטיג אז מען זאל פון אלעם אוועק קוקען למען השם ולמען כבוד שמו, האט ער נישט געקענט פועלן צו שיקען זיין עולם. און ביי אלע פראטעסטען די אלע יארען, קומט נישט ר' אהרן און קיין איינע פון זיינע מענטשען.
פארגאנגענעם זומער ווען עס איז געווען א גרויסע פראטעסט דורך די התאה"ר, האט ר' אהרן און זיין "וועד הצלה" פארופען א "קאר פעקעטינג", דאס הייסט אז קארס פארען ארום מיט פלאקאטען ארום דעם מדינת ישראל קאנסולאט. עס איז אינטערסאנט מסביר זיין פארוואס ער האט אראנזשירט א קאר פיקעטינג און נישט קיין מאסען פיקעטינג ווי מען האלט דרשות און מען איז פארזאלמעלט אויף עטליכע בלאקס, ווייל ביי א מאסען פיקעטינג וועט דאך יעדער זען אז ער האט נישט דעם עולם און ער וועט אויך נישט האבען די רבנים וואס דער ברודער און די התאה"ר האבען געהאט.
אבער ווען מען מאכט א קאר פיקעטינג, איז נישט דא קיין חשבון און מען קען שרייבען אין בלאט אז טויזענטער טויזענטער קארס האבען זיך באטייליגט ביים פראטעסט, און עס איז אומאפרעגבאר ווייל איןמאנהעטען איז דא יעדען טאג ארום דריי הונדערט טויזענט קארס... דאס איז טייטש, זיך א עצה געגעבען.
און דער בלאט האט נישט דיסעפוינטעט די אקסן, און שמואל ווידער האט זיי דערליווערט צוויי מעכטיגע באמבעס.
1) ער האט ארפגעברענגט א בילד ווי הערצקע צוויבעל רעדט אויף א סעלפאון אין די גאס, און שמואל ווידער שרייבט אונטערן בילד אז הרה"צ דער ראה"כ פון סאטמאר רעדט צום איזראעלישען קאנסיל... און
2) ער האט א וואך נאכדעם געשריבען אויפן הויפט קעפל פון בלאט אז מען האט פרייטאג ארויסגעלאזט די ארעסטירטע אידען פון תפיסה וועגען דעם מאסען פיקעטינג דאנערשטאג.
ווען עס איז געווען דער פראטעסט בין כסא לעשור אין פארנט פון די יו ען, האט ר' אהרן נישט געלאזט גיין צום פראטעסט, הערט די סיבה: דער רבי זי"ע האט נישט געלאזט פראטעסטירען אין פארנט פון די יו ען...
די פאריגע וואך איז פארגעקומען א ערנסטע אסיפה ביי ר' אהרן אין שטוב, ווי יעדער ווייסט איז דער פארגאנגענעם ווינטער געווען א שטורעמישער אנבאלאנגט די מערכות וואס אחב"י אין ארה"ק האבן געפירט מיט די רשעים ימ"ש. מ'האט פון ר' אהרן קיין ווארט נישט געהערט, די זאלונים זענען ארויסגעגאנגען איין מאל און נאכאמאל פראטעסטירן, און פונעם אהרונישן לאגער הערט מען נישט קיין פיפס. חוץ דעם גרויסן קאווער אפ עצרת אויף די הליכה לבאגאץ פארגאנגענעם ה' אייר וואס האט מכלומר'שט געזאלט דינען ווי א מחאה קעגן די ציונים, און האט ליבערשט געדינט ווי א מאסן ליצנות פארזאמלונג וואו מ'האט די אקסן מסביר געווען אז די עכטע ציונים זענען הרבנים הגאוה"צ חברי הבד"ץ דקהל יטב לב שליט"א וועלכע גייען אין באגאץ.
דא האט זיך אנגעהויבן א פרישע מערכה אנטקעגן די חפירות איו אשקלון און אין יפו, און די וועלט הייבט זיך אן וואונדערן וואו איז אונזער ר' אהרן, חוץ זיין שקדנות בתורה וואס ווערט געפאמפט אין די פרעסע, ווערט דאך ערווארטעט פון איינער וואס רופט זיך "סאטמארער רבי" אביסל מער ווי בלויז גדלות בתורה און מאכן חתונה תקנות.
ביי די אסיפה האבן זיך באטייליגט די גאר גרויסע קעפ, מתתי' דייטש און שמואל ווידער, אלישע הורוויץ און בנציון לאוב, שמואל שלמה טעלער און הערצקא צוויבל און כולם פה אחת האבן באשלאסן אז אזוי ווי דער איזרעלישער פרעמיער ביבי נתניהו קומט אויף ניו יארק קומענדיגן מאנטאג גייט ר' אהרן פערזענליך ארויס גיין אנטקעגן אים פראטעסטירן, פארשטייט זיך אז מ'דארף מתפלל זיין אז ביבי זאל נישט אויפהערן גראבן, אזוי וועט ר' אהרן קענען אנגיין מיט די מערכה פאר יארן, און דער עיקר אז אין אלע צייטונגן וועט מען שרייבן אז נישט נאר ר' אהרן שרייבט בריוון פאר אבאמא, נאר ער גיבט אפילו אנווייזונגען פאר ביבי וויאזוי צו פירן דאס לאנד.
ר' אהרן האט גע'טענה'ט אז מ'קען נישט גיין סתם אזוי ארויסגיין עס זאל זיין א טרוקענער פראטעסט, ער וויל א פראטעסט וואס זאל זיין אסאך פאן און עקשאן, די ציונים זאלן זיך דערשרעקן צום טויט אז מיט ר' אהרן הייבט מען זיך נישט אן.
אלישע איז אויפגעקומען מיט א געוואלדיגע בייפאל, איינער פון די גדולי ראשי ישיבות פון גרעיטער ניו יארק וואס גייען זיך באטייליגן, גייט פרעגן ר' אהרן ביים פראטעסט צו ער האט נישט מורא אז די ציונים וועלן אים שיסן, און ר' אהרן גייט אויפשפרינגען אין זיך עפענען דאס זיידענע העמעדל אין שרייען זאלן זיי שיסן!
די אהרונים גייען ווערן זייער עקסיידעט, מ'גייט אנהויבן שרייען "פוי" ווי אין א כאר פאר א האלבע שעה נאכאנאנד, דערנאך גייט ר' אהרן אליין אויפטרעטן מיט א פלאקערדיגע דרשה, אזאנס וואס כלל ישראל האט נאכנישט זוכה געווען פאר יארן צו הערן, ער וועט צולייגן בטטו"ד אויף זיין אייגענארטיגע שטייגער פונקטליך וואס די ציונים טוען אלץ אפ, און דער ציבור וועט זיך צוגיין מיט א געהויבענע שטומינג...
תוקן על ידי רעיוואד ב- 30/05/2010 21:03:50
