הודאת בעל דין:
שעדליכקייט פון "מויסטשער קיור" ערשיינט אין ליטעראטור פון די פאבריצירער
די שעדליכקייט פון "מויסטשער קיור" איז שוין היינט באקאנט איבער די וועלט, אבער עס וועט זיין אינטערעסאנט צו הערן וואס עס האט צו זאגן דערוועגן די קאמפאני אליינס וואס פראדוצירט דאס.
לויט'ן געזעץ דארף מיט יעדן כעמישן פראדוקט בייגעלייגט ווערן א "מאטעריאל סעיפטי דאטא שיעט", ד.ה. א דאקומענט וואס דערציילט אלע אינגרידיענטס וואס דאס פארמאגט אין זיך.
ווי אויך דארף אינעם דאקומענט שטיין ארויסגעשריבן פונקטליך וואספארא נעגאטיווע ווירקונגען דאס קען האבן אויף דעם וואס קומט אין בארירונג דערמיט.
ווי אויך זאגט דער געזעץ, אז ווען א קאנטראקטאר נוצט א פראדוקט, צב"ש פעינט וכדומה, אין א הויז פון א קליענט, דארף ער איבערגעבן פאר'ן קליענט די אלע פאפירן און דאקומענטן וואס דערציילן איבער דעם פונקטליכן אינהאלט און די ווארענונגען אויף דעם פראדוקט.
לאמיר אלזא כאפן א בליק און זעהן וואס די פראדוצירער פון "מויסטשער קיור" האבן צו זאגן דערוועגן.
"קורצע אויסשטעלונג צו דעם פראדוקט קען פאראורזאכן צייטווייליגע אדער לענגערע איבערבלייבענישן, אפילו אויב דער מענטש האט באקומען זאפארטיגע מעדיצינישע באהאנדלונג".
"מויסטשער קיור" אנטהאלט: זיילין, עטיל-בענזין, טאלעיון דיסייאנעיט, און נאך אנדערע שעדליכע מאטעריאלן, וואס ס'איז א סכנה דאס אריינצואטעמען.
אבער לייענט ווייטער וואס די קאמפאני שרייבט: "אויב מ'איז צו שטארק אויסגעשטעלט צו דעם פראדוקט, קען עס בארירן די צענטראלע נערוו-סיסטעם, און מ'קען האבן סימפטאמען ווי קאפ-ווייטאג, שווינדלען, ווערן באוואוסטלאז, פארלירן דעם באלאנס, און נאך. אריינאטעמען דירעקט פון דער נאנט קען ברענגען פערמאנענטע מוח און נערוון שאדנס, אדער טויט" (ה"י).
אויך שרייבן זיי אז דאס קען ברענגען אטעמען פראבלעמען, בראנקייטיס", וואסער אין די לונגען, און הארץ פראבלעמען.
איינע פון די אינגרידיענטס אין "מויסטשער קיור" קען ברענגען לונגען פראבלעמען, אלערגיעס, הארץ ווייטאג, און אסטמא אטאקעס.
אויך די בלוט, לעבער, נירן און אנדערע איברים קענען ליידן פערמאנענטע שאדנס ה"י פון זיין א לענגערע צייט אויסגעשטעלט צו "מויסטשער קיור".
און דאס איז אלעס בלויז פון אריינאטעמען. שטעלט אייך פאר וואס עס קען פאסירן צו דעם מענטש וואס קומט אין בארירונג דערמיט. "די הויט קען ווערן אויסגעטרוקנט, און ס'קען ברענגען דערמעטייטיס (הויט אנטצינדונג). אויב קומט עס אין בארירונג מיט'ן אויג, קען עס ווערן אויפגעשוואלן, און קען שעדיגן דעם שווארץ-אפעל פון אויג" (ה"י).
אויך שרייבן זיי קלאר אז "מויסטשער קיור" אנטהאלט פארשידענע אינגרידיענטס וואס קענען ברענגען די ביטערע מחלה ל"ע.
מענטשן מיט פריערדיגע פראבלעמען, כראנישע הארץ פראבלעמען, אסטמא פראבלעמען, כראניש בראנקייטיס, און אנדערע כראנישע פראבלעמען, זענען אין א פיל גרעסערן געפאר פון געשעדיגט געווארן דורכ'ן אריינאטעמען "מויסטשער קיור", שוין אפגערעדט פון קומען אין בארירונג דערמיט.
ווי שוין באריכטעט, אנטהאלט "מויסטשער קיור" די שעדליכע "בענזין", וואס איז באקאנט אלס א כעמיקאל וואס קען ברענגען די ביטערע מחלה ל"ע. אין א שטודיע וואס איז דורכגעפירט געווארן במשך די יארן, האבן מענטשן וואס זענען געווען אויסגעשטעלט צו בענזין ביי די ארבעט וכדומה, שפעטער באקומען די ביטערע מחלה אין די בלוט, אדער אנדערע בלוט קראנקהייטן, אריינגערעכנט לוקימיע, מיילאדיספלעסטיק סינדראם (וואס קען ווערן פארוואנדלט אין לוקימיע מיט די צייט), עפילעסטיק אנימיע, לימפאומע, און מולטיפל מייעלאומע. אויך אנדערע "טאקסיק" סובסטאנצן קענען ברענגען די ביטערע מחלה און אנדערע מחלות אין די בלוט ר"ל.
אין א שטודיע וואס די בארימטע "ניו יארק יוניווערסיטי און קארנעל האספיטאל" האט דורכגעפירט, איז מויסטשער קיור אויך א שטארקער גורם פאר "פרויען קענסער" ה"י.
בענזין איז א כעמיקאל וואס ווערט באשאפן פון רויע אויל, און איז א טייל פון פעטראליום פראדוקטן, אריינגערעכנט געזאלין.
די פארבינדונג צווישן בענזין און בלוט קראנקהייטן זענען שוין דאקומענטירט געווארן נאך אינעם 19'טן יאר הונדערט. די פארבינדונג צווישן בענזין און לוקימיע איז צום ערשטן מאל באריכטעט געווארן אין יאר 928'.
אין יאר 948' האט די "אמעריקען פעטראליום אינסטיטוט" פובליצירט א באריכט וואס האט געזאגט אז דאס זיין אויסגעשטעלט צו בענזין איז פארבינדן מיט לוקימיע. דער באריכט איז געקומען צום אויספיר אז די איינציגסטע וועג וויאזוי צו פארמיידן די רעזולטאטן, איז אז מ'זאל גענצליך אוועקשטיין פון בענזין.
זינט דאן זענען שוין דורכגעפירט געווארן עטליכע שטודיעס וואס האבן געוויזן אז א צאל ארבייטער - אריינגערעכנט פלעסטיק ארבייטער, פעינטערס, די וואס דעליווערן די געז, די וואס ארבעטן ביי פעטראליום ריפיינערי, כעמיקאלע ארבייטער, ראבער ארבייטער, און "פרינטינג פרעס" איינגעשטעלטע - זענען געווען פיל מער אויסגעשטעלט צו באקומען לוקימיע און אנדערע בלוט קענסערס און מחלות ל"ע אלס רעזולטאט פון זיין אויסגעשטעלט צו בענזין ביי די ארבעט.
די ארבייטער וואס ארבעטן מיט בענזין אדער ענליכע כעמיקאלן, זענען אויסגעשטעלט צו די מחלות דורכ'ן אריינאטעמען די לופט פון די כעמיקאלן. אויך קען מען דאס באקומען דורך די הויט, ווען מ'כאפט אן די כעמיקאלן מיט די הענט, צב"ש אז מ'כאפט אן א זאך וואס איז געווען געווייקט אין בענזין אדער אז מ'גיסט אויס בטעות אביסל פון דעם כעמיקאל אויף די הויט.
איינע פון די פאפולערע "מינעראל ספיריטס" וואס האט אמאל אנטהאלטן בענזין, איז "ליקוואד רענטש". שטודיעס האבן געוויזן אז אפילו מ'איז אויסגעשטעלט צו נידריגע שטאפלען פון בענזין קען דאס ברענגען לוקימיע און אנדערע בלוט קענסערס און מחלות ה"י.
ווי דערמאנט, איז בענזין א כעמיקאל וואס געפינט זיך אויך אין גאזאלין. עס וועט זיין אינטערעסאנט צו באריכטן, אז ביים לעצטיגן אויל-אויסגוס פון "בריטיש פעטראליום" ביים "גאלף אוו מעקסיקא", זענען געווען רייניגונג ארבייטער וואס האבן זיך אפגערעדט אז זיי באקומען קאפ-ווייטאג, ס'שווינדלט זיי בשעת די ארבעט און אויך שפעטער, זיי האבן איבלען, און שטעכענישן אין די נאז און אין די לונגען.
נאך א קורצע אויספארשונג איז פעסטגעשטעלט געווארן אז די סימפטאמען קומען פון די בענזין וואס געפינט זיך אין די אויסגעגאסענע אויל, וואס דאס ווערט פארשפרייט אין די לופט און די ארבייטער אטעמען דאס אריין כסדר. אין לואיזיאנא זענען 75 באהאנדלט געווארן נאכ'ן האבן אטעמען פראבלעמען, וואס איז געקומען פון אריינאטעמען די שעדליכע כעמיקאלן פון די אויל.
די "ענווייראנמענטאל פראטעקשאן עידזשענסי" (אי-פי-עי) האט אפילו אויפגעשטעלט א ספעציעלן מאניטארינג סיסטעם, צו האלטן אן אויג אויף די קוואליטעט פון די לופט נעבן דעם גאלף אוו מעקסיקא.
די שעדליכקייט פון בענזין איז אלזא זייער קלאר, און די קאמפאניס וואס פראדוצירן שעליכע כעמיקאלן, אריינגערעכנט "מויסטשער קיור", שרייבן דאס קלאר ארויס.
דער פראבלעם איז אבער, אז די קאנטראקטערס געבן נישט איבער די אינפארמאציע פאר זייערע קליענטן. די דאקומענטן וואס אנטהאלטן די אלע אויבנדערמאנטע פאקטן, קומען קיינמאל נישט אן צום קאנסומער, ממילא ווערן זיי נישט געוואויר פון די שעדליכקייט דערפון, וואס טאמער זיי וואלטן דאס געוואוסט וואלטן זיי זיך זיכער אפגעהאלטן דערפון און געווארנט די קאנטראקטארס דאס נישט צו נוצן.
נאכ'ן ליינען די פאקטן וואס די קאמפאניס שרייבן, שטעלט זיך די פראגע: וועלכער איד וואלט געוואלט אז א אידיש קינד זאל ח"ו דיאגנאזירט ווערן מיט אפילו נאר איינס פון די מחלות ה"י? וועלכער איד וואלט געוואלט הערן אז ביי אים אין די משפחה איז די כח הראי' אדער די הארץ פון א קינד ח"ו געשעדיגט געווארן? וועלכער איד וואלט געוואלט פארברענגען אין שפיטאל מיט א קינד וואס האט אנטוויקלט לונגען אדער נירן פראבלעמען צוליב אביסל לייכטזיניגקייט?
עס איז קלאר אז נאכ'ן ליינען די ערשטהאנטיגע עדות'שאפט פון די פראדוצירער פון די שעדליכע כעמיקאלן, וועלן מענטשן שטיין ווייט דערפון און נישט צורירן צו די שעדליכע "מויסטשער קיור" און אנדערע ענליכע פראדוקטן.
