פרישע סקאנדאל: מיעל מארט פלייש

אלעס וואס עטץ שרייבטס דא אין דעם אשכול איז זייער פיין און וואיל זה בכה וזה בכה. אבער למעשה די פראבלעם ביי די בהמה פלייש איז דאך שוין געווען א סאך ערגער אין שנת תשמ"ג אזוי וויא יעדער קען אליין הערן אויף די "טעיפס" וואס איז ארויסגעשמוגעלט געווארן פון יענע היסטארישע אסיפה. כינוס צדיקים הנאה להם והנאה לעולם ביי וועלכע עס איז נאך געזיצען די גדולי עולם רבנים פון דער אלטער היים כ"ק הגה"צ אדמו"ר מפאפא זצ"ל וכ"ק בעל ברך משה זצ"ל. והגה"צ ממוין לעבאוויטש.וואידיסלאוו.טארטיקאוו.טענקא.הרב אויש.והרב מנירבאטור הבעל המכשיר של מיעל מארט בימים ההם זכר צדיקים לברכה ולהבחל"ח הרבנים הגאונים הצדיקים מאודווארי.ממאנטעווידעא .מקארלסבורג.מוויזניץ לאורך ימים ושנים טובים.    און ב"ה צייטען האבען זיך געטוישט . ליידער המה הלכו למנוחות ואותנו עזבו לאנחות עס איז דא נייע בעלי מכשירים (בעסער אדער ערגער?) נישט קיין נפ"מ.. אונטערשטע שורה איז די וואס עסן מיעל מארט פלייש מיטן הכשר פון נירבאטור רב און ווילן נישט הערן פון קיין שום מכשול און אויף יעדע זאך האבען זיי א תירוץ אפילו אן אמתן.. זאל עס זיי וואיל באקומען.  אבער פארוואס האלטן זיי גאנצע וואכען און חדשים אין איין בארעדען דעם קאמפיטישאן. "סופרים-רובשקין" אדער "משמרת" און ווילן איינרעדען יעדען איינעם כי לי כל הארץ אז נאר מיינס און נאר וואס איך געב א הכשר איז כשר און יעדער אדער יענער איז טריפה וואס דער אמת איז דאך נישט אזוי.  . קען זיין אז דו ביסט אויך כשר עס איז נישטא קיין מכשול אבער יענער זייט ער האט איינגעשטעלט א מוראדיגען גוטן סיסטעם מיט 50 שוחטים יראים ושלימים (זיי באלאנגען טאקע נישט צו קיין פארטיי)אבער זיי זענען דאך עכט היימישע חסידישע אידען יראים ושלימים ערליכע אידען מיט שטריימל בעקיטשע און א סאך מיט ווייסע זאקען וואס גייען יעדען טאג אין מקוה(נישט קיין או יו רבנים). און דער רב המכשיר איז אויך א ת'"ח עצום וואס פאר א ענין איז דאס צו פארדרייען דעם עולם דעם קאפ מיט פוסטע נארישקייטן שטותים  אז אני ואפסי נאר איך בין כשר און קיינער מער. וועגען דעם געשעט אלע ערעורים ווייל איינער האקט אויפן צווייטן.. ווען מען זאל וועין ארבעטן צוזאמען וואלט דאך דאס "כשרות" געווען זייער שטארק און הייליג ביי יעדען איינעם . יעדער וואלט מחשיב געווען די רבנים און די גאס וואלט ארויפגעקוקט אויף די מכשירים (מינאי ומינך תתקלס עילאה) רוב דרשות ביי אלע צוזאמענקופטן וועגן "כשרות" שטעלט זיך אייביג אויף איינער וואס קען גוט בארעדען דעם צווייטן און דער עולם גולם קויפט דאס פאר גוט געלט.

צווייטענס דער היימישער עולם צאלט גענוג טייער ווייל זיי ווילן אז די רבנים זאלן זיי צושטעלען א "הונדערט פראצענטיגן כשרות" אהנע ערעורים און קאפ דרייעניש מען זאל זיך נישט דארפן ח"ו ממש עקלען צו עסן א פראדוקט אדער א שטיקל פלייש.

ווילסט מחזק זיין דיין ביזנעס זאג "אנ"ש קויפטס נאר פון מיר" אבער ח"ו צו זאגען אז דאס אנדערע איז נישט כשר ווען עס איז דאך שקר וכזב . באגראבסטן דאך דיך אליין ווייל יענער וועט אויך קומען און זאגען אז זיינס איז נאר כשר און נישט דיינס

היינט איז דאך א אפענע וועלט מען קען נישט פארקויפן קיין באבקעס. עטס זעהט אליין אלע יארן האט מען אונדז אויסגעלערנט אז "העולם טשיז" איז טריפה ווער געדענקט דען נישט ווען א יונגעל האט געברענגט אין חדר א שטיקל "העולם טשיז" האט מען עהם אויסגעפראקט און אויסגערופן הויעך אין לאנטש רום קעגען אלע יונגלעך אז ער ווערט געשטראפט ווייל ער האט געגעסן דעם טרייפענעם העולם טשיז למען ישמעו ויראו.

און ווען א סטאר האט אריינגענומען העולם קעז האט מען געשריגן "שעמסט דיך נישט שייגעץ!! דאס געסטו פאר אידישע קינדער צו עסן" און היינט זעהט מען אין איין רגע עס האט פלוצלונג באקומען די הכשר פון הרב בנימין גרובער . געווארן אויס טריפה ואין פוצה פה ומצפצף(וואס מען האט נישט געמאכט קיין שום שינו נישטאמאל געטוישט משגיחים אויפן פארעם וכדומה) זעהט מען דאך קלאר בעיני בשר אז אלעס איז נאר געווען א פאליטיק . ווען מען וואלט קיינמאל נישט בארעדט "העולם"  נאר מען וואלט געזאגט אז לטובת הענין זאלן מיר נאר קויפן "מהדרין" וואלט קיינמאל נישט געווען די אנטוישונג(דיסעפוינטמענט)

דאס זעלבע מיט "ניו סקווער" מילך איך אליין בין געווען אין א ביהמ"ד דער שמש איז געלאפן צופרי און געברענגט מילך פאר די קאווע "ניו סקווער מילך" איז אויפגעשטאנען אן ערענסטער סאטמארער חסיד און געמאכט "קולות" געוואלד "טרייפענע מילך" ברענגסטו דא אריין אין ביהמ"ד און דער יוד האט נישט גערוט ביז ער האט אויסגעגאסען אלע פלעשלעך מילך. היינט צו טאג טרינקען סאטמארע חסידים אליין "ניו סקווער" מילך און ווייסן שוין דעם אמת אז עס איז פונקט אזוי כשר וויא "גאלדן פלאו"

דער צעלימער רב זי"ע וואס האט איינגעפירט דא אין אמעריקא "חלב ישראל" מיט "מסירת נפש" האט קיינמאל נישט גערעדט אויף א צווייטן בעל המכשיר. ער האט מחזק געווען "קליינס" אייז קריעם חאטש זיי האבען נישט געקויפט די מילך ביי זיין קאמפאני. ער האט אמתדיג געמיינט טובת ישראל צו געבען יודען כשר.מאכלים וועגען דעם האט עהם קיינער נישט בארעדט

א  מלחמה גייט אזוי. דו גייסט בארעדען יעדען קוקט מען נאך וואס עס טוט זיך ביי דיר  ותו לא

די גרויסע השגחה אין וויליאמסבורג איז באשאפן געווארן צו בארעדען יעדען איינעם אויסער זיך אליין.זיי קענען כסדר בילען און שרייען "נאר מיינס איז גוט נישט יענעמס"

האט מען דען נישט געטראפן ביי זיי אמאל אין אלע "וויניגער פראדוקטן" "יין נסך" און זיי האבען נישט געוואלט מודה זיין  אדער זיפט מען דען ביי זייערע בעקערייען די מעהל.  טויזענטער אידען זענען מהדר ביי זיך אין שטוב צו זופען די מעהל ווען מען באקט . און ווען מען עסט זייערע חלות אדער ברויט איז עס פול מיט ווערעם אומגעזיפט.

עס איז אמאל געווען אמעשה ביי רבי אהרן הגדול מקארלין זי"ע ער האט געטיילט שיריים יו"ט פסח. האט זיך א פרומער חסיד אנגערופן רבי איך עס נישט ווייל איך מיש מיך נישט מיטן רבין אויך נישט(פסח מישט מען זיך נישט מיט אנדערענס עסענס)  האט עהם רבי אהרן קארלינער זי"ע געזאגט "גיי אהיים קוק אין דיין וואסער וואס דו האסט אנגעשעפט אויף פסח(פרומע אידן שעפען אהן פאר פסח וואסער אויף גאנץ פסח)  איז דער חסיד אהיימגעגאנגען און ער האט געטראפן א גאנצן ברויט אין זיין וואסער. איז ער געקרומען צו לויפן צום הייליגען רבין און געוויינט און געיאמערט '"רבי פארוואס האט איר מיר נישט געזאגט פאר פסח איך זאל נישט נכשל ווערן..האט אים דער רבי גענטפערט הער מיך אויס איך קוק קיינמאל נישט אריין וואס טוט זיך ביי יענעם איך האב אבער געזעהן אז דו ביסט אזוי ערליך אז נאר ביי דיר איז כשר און גוט אפילו ביי מיר אויך נישט האב איך געקוקט און געטראכט לאמיך זעהן וואס טוט זיך טאקע ביי דיר און איך האב ליידער געטראפן.

דאס זעלבע טייערע אידישע קינדער רבנים וראשי ציבור און צייטונגען די אחריות איז גרויס פון היינט מאל און וויטער זאגט מיין הכשר איז גוט גיי נישט לויפן צום וויזניצער רבין ר"מ פון מאנסי עהם משוגע מאכן אז ער זאל נאר לאזן עסן מיעל מארט

דער הייליגער חיד"א שרייבט "אז עס איז געווען נאך א סאך אזאלכע חיבורים וויא דער שו"ע וואס דער הייליגער בית יוסף האט געמאכט" נאר ווייסטו פארוואס דעם ב"י שו"ע איז נתקבל געווארן לפסק הלכה בכל תפוצות ישראל ווייל דער ב"י האט קיינמאל נישט אוועקגעמאכט דעם צווייטענס חיבור.

איינער האט היינט דערציילט ער איז געווען היינט אין א בוטשער און דער בוטשער זאגט אז ער קען נישט פארקויפן אפילו איין שטיקל בהמה פלייש. ווייל עס איז געווארן א איבערקערעניש א דעמעדזש אינעם מארקעט. מיטוואך נאכט איז אין בארא פארק אין עטרת חי געווען אגרויסע חתונה מען האט געקענסלט און נישט געלאזט סערווירן בהמה פלייש וועגען דעם איבערקערעניש.

דער זעלבער בוטשער זאגט חאטש ער האט גרויס צער. דאך האט ער הנאה ווייל וויינשטאק פון מיעל מארט פלעגט באהאנדלן די בוטשערס זייער שטרענג און יעצט ברעכט ער זיך אביסל ער ווייסט אז די קאמפאטישאן איז פונקט אזוי כשר וישר און דער עולם האט א אויסוואל.

א חשובער רב האט מיר דערציילט אז ער איז אריין אין א ריזיגן קהלישן בוטשער סטאר אין ווילימאמסבורג (עס איז גוט אז עס באלאנגט צו קהל אבער דער מענעדזשער באקומט פראצענט איז ער באלד וויא א בעה"ב) זעהט ער אז מען האט אריינגעברענגט א סך "לעמעלעך" (ביי לעמער איז דא א פראבלעם מיט די שחיטה ווייל טאמער מען שערט נישט אפ די וואל פון האלז פארן שחטן איז דא א שאלה פון "חלדה" וואס קען זיין נבילה מדאורייתא רח"ל . פרעגט דער רב וועמעס הכשר איז די לעמער ענטפערט דער מענעדזשער "וואס הייסט" אלעס דא אין בוטשער האט די הכשר פונעם דיין גייט דער רב ארויס פון בוטשער אויפן גאס און טרעפט גלייך דעם דיין פרעגט ער עהם אויב ער גיט א הכשר אויף לעמער ענפערט דער דיין "ניין" פרעגט ער פארוואס איז דא אין בוטשער געשאחטנע לעמער . ענטפערט דער דיין עס איז נישטא עכ"פ ער ווייס נישט דערפון. ע"כ המעשה אמת.

די לעמער פונעם בוטשער זענען מסתם געווען כשר אבער ביים אנדערען רב המכשיר איז פונקט אזוי כשר מען דארף נישט טאג אוןנאכט האקען אויף יענעם די וועלט זאגט "קוק נישט נאר וואס מען נעמט אריין אין מויל קוק אויך וואס גייט ארויס פון דיין מויל(בעש"ט הק' זי"ע)

א הימישער דיסטיריובאטאר האט געוואלט אריינברענגן קוקיס אין קרית יואל פאר 18 יאר צוריק כשר קוקיס. דער וועד הכשרות מיטן רב האבען נישט געלאזט אז די גראסעריס זאלן פארקופין די קוקיס איז דער סוחר געגאנגען צום רב און האט געפרעגט איך האב דאך א גוטן הכשר פארוואס לאזט מען עס נישט אריין אין די געשעפטן . האט ער גענטפערט איך וואלט געקענט זאגען פארן עולם "אז עס איז נישט כשר" און דער עולם וואלט געגלייבט אבער איך זאג דיר דעם אמת איך וויל אז די יודען וואס באלאנגען אהער זאלן ענדערש מאכן פרנסה נישט אנדערע זאלען אהערברענגן זאכן און אוועקנעמען זייער פרנסה דאב איז חאטשיג דער אמת(צו מען מעג דאס טון אדער נישט ווייס איך נישט)

איינער אליעזר באש האט פאר הונדערט יאר צוריק ארויסגעגעבען א בוך פון די שטאט סיגעט דארטן שטייט אז מען האט געאסערט אין סיגעט אריינצוברענגען פלייש(שחוטי חוץ) פון אנדערע שטעטלך כדי נישט מקפח זיין פון די קהילה און אף על פי כן דאך האבען חשובע אידען שטילערהיייט געגעסן פון די שחיטות ווייל זיי האבען געוויסט אז עס איז פונקט אזוי כשר נאך אפשר בעסער נאר ברבים כדי מחזק צו זיין די אייגענע קהל וועגן דעם איז געמאכט געווארן דער איסור.

חוץ דעם הרב בעלסקי געט דאך א הכשר אויף קוקו קאלא און ביי אונדז האט מען קיינמאל נישט געלאזט טרינקן קוקא קאלא. וואס אמאליגע צייטן ווען א יונגעל האט דערציילט פארן מלמד אין חדר אז א צווייטע יונגעל האט געטרונקן קוקא קאלא האט מען דעם צוויטן יונגעל אזוי פארשעמט אין חדר עס איז ניטאמאל שיין צו שרייבען וואס מען האט עהם געטון. און היינט דער זעלבער רב המכשיר פון קאוקו קאלא שרייבט אז אונזער פלייש איז כשר עס איז דאך פשוט א געלעכטער  (מען רעדט שוין נישט וועגען ציונות אדער אייגענע האר)  ווען מען וואלט נישט אלע יארן געהאקט אויף בעלסקי מיט אוי יו וואלט מען חאטש געקענט דערהערן אוןן אראפשלינגען א בריעף אין אונזערע צייטונגען פון הרב בעלסקי

חכצים הזהרו בדבריכם רעדט נישט אויפן צווייטן  שמא מיט די צייט וועט עטץ דארפן צוקומען און נוצען דעם וועם איר האט בארעדט און וואס איר האט בארעדט והעושה שלום במרומיו הוא יעשה שלום עלינו

דאס איז גענוג פאר די ערשטע דרשה. ויותר מה שכתבתי בגלוי לפניכם כתוב כאן.ברמז וד"ל.