מיר ליידן פון ציונות אדער זיי ליידן פון א פאביע
מיט וואונדער האבן מיר געזעהן א שארפן בריוו, געוואנדן אין אונזער ריכטונג אין א צייטונג אין דער אידישער שפראך וואס דינט א געוויסע גאר באצייכענטע קרייז אבער רופט זיך מאיזה סיבה שהוא "דער ארגאן פון אומאפהענגיקע ארטאדאקסישע אידענטום אין אמעריקע". איז געווען דארט א בריוו ווי עמיצער איז כלומר'שט מתמרמר קעגן ציוניסטישע צייטונגען און ער קלאגט אויף דעם אז א ערליכער איד קען ארייננעמען דעם כל העולם כולו אין שטוב. אלס ראיה ברענגט ער א שטיקל פון אונזער צייטונג "דער אידישער וועלט" ווי דער שרייבער האט אנטדעקט ממש ציונות....
מיר ווילן ענטפערן, נישט ווייל עס שאדט אונז, אדרבה עס איז "פרי עדוועטייזמענט" נאר ווייל אז דער "פירשפרעכער פון ארטאדאקסיע" שיסט אין אונזער ריכטונג פאסט נישט צו איגנארירן און מזלזל זיין אין ארטאדאקסיע חלילה. און כדאי אויפצוקלערן עס זאל נישט זיין קיין חילול השם, אז א ציוניסטיש בלעטל קויפן דרייסיג טויזנט חרדישע אידן א וואך און די צייט וואס דער אומאפהענגיקער ארטאדאקסיע צייטונג האט קארגע דריי פיר טויזנט קויפער, ניין מיר זענען קיין ציונים און נישט ציונות טוט זיי וויי.
מיר וואלטן אויך געקענט זיך באהאלטן אונטער דעם ברייטן רוקן פון א אנאנימער בריוו שרייבער, אבער מיר זענען נישט אזוינע פחדנים מיר וועלן זיך אפיציעל ארויסשטעלן זיך מסביר זיין. קודם כל דארף דא קלאר ווערן אז זיי מיינען נישט דעם ציונות, זיי פארשטייען אויך דעם כלל פון אלו ואלו דברי אלוקים חיים און זיי אליין ברענגען נייעסן און בעיקר מעשיות פון גדולי ישראל אויך פון די וואס זענען נישט איינשטימיג מיט דעם הייליגן סאטמארער רב זצ"ל'ס דעת יחידאה.
אונזער ליניע איז אז מיר נעמען נישט קיין שטעלונג אין עניני אמונות ודעות מיר קענען ברענגען בילדער פון א סאטמארע הפגנה קעגן בחירות, און באלד נאך דעם בילדער פון גדולי עולם קעגן וועמען די הפגנות זענען געצילט ווי זיי גייען צו בחירות, יעדער האט זיין שיטה און מיר פסק'נען נישט, מיר ווייסן אז די גדולי עולם זענען העכער אונזער שיקול הדעת.
יעצט צום ענין. מיר האבן געברענגט בילדער ווי אידן זענען שופך צקון לחשם ביים מקום השכינה כותל המערבי, בילדער פון די גדולי העדה החרדית ביים כותל און אנדערע גדולי וצדיקי ארץ צווישן זיי אויך א בילד פון אדמו"ר הקדוש מסאטמאר זי"ע ביים כותל פארן כיבוש. אויב כותל איז ציונות זענען מיר שטאלצע ציונים צוזאמען מיט הגה"צ רבי ישראל יעקב פישער זצ"ל און יבלחט"א רבי משה שטרנבוך שליט"א און כ"ק האדמו"רים שליט"א בני אדמו"ר מתולדות אהרן זצ"ל וועמענס בילדער ביים כותל באצירן דעם כל העולם כולו.
מיר זענען בשיטה אז מען זאל גיין צום כותל? פאר א באבוב און בעלזער חסיד, א ספרדי וואס גייט על פי הוראות הגר"ע יוסף שליט"א, א בן תורה וואס איז נכנע צו הגרי"ש אלישב און הגראי"ל שטיינמאן שליט"א. יא! א חסיד פון סאטמארער רב זי"ע חלילה! אויב ער גייט איז ער מהרהר אחרי רבו א גדול בישראל.
און יעצט איבער דעם ארטיקל פון דעם שרייבער ציון קדישזון -א טייערער איד ווייט פון א ציוני-, די סיפורים איבער אידן ביים כותל זענען טייערע סיפורים וואס זענען אפילו אין איינקלאנג מיט די סאטמארער שיטות, בלאזן שופר ביים כותל צו די בריטישע ווילן צו נישט, איז א מסירות נפש אקט אזוי ווי מאכן מציצה בפה אין נוא יארק אפילו אויב דער רעגירונג לאזט נישט. און מתפלל זיין אז איבער דאס יאר זאל מען בלאזן שופר ביי אן אויסגעלייזטן כותל אן קיין בריטישע און אין די הענט פון גואל צדק איז נאר ציונות ביי איינעם וואס האט אן איבריגע פאביע און איז יעדן חושד אין ציונות רח"ל ה' ישמרנו.
דער ארטאדאקסישער צייטונג שטורעמט דארטן קעגן וועם זיי באצייכענען אלס א געוויסער מעשיל געלבשטיין. עס פאסט נישט אז א צייטונג וואס דעקט ארטאדאקסיע זאל אזוי באצייכענען דעם בארימטן ירושלימער פיגור, דער נקי הדעת און שומר המקדש הצדיק רבי משה הלל-מעשיל- געלבשטיין זצ"ל איש אמונו פון עמוד האש רבי משה יהושע יהודה לייב דיסקין זי"ע מרא דארעא דישראל. וועלכער האט ווי א לייב געקעמפט פאר קדושת המקדש און לוחם געווען קעגן די פרייע עלעמענטן מען זאל נישט חלילה ארויפגיין אויפן הר הבית. ביי יעדן שטיקל ידען איז רבי מעשיל נישט קיין אלמוני בן בלי שם און א געוויסער מעשיל... אין דעם היימיש אינטרעסאנט ספר'ל ירושלים של מעלה פון דעם היימישן (און קנאישן) מנחם מענדל איז פארהאן גאנצע פרקים צו שילדערן דאס גדלות פון רבי מעשיל זצוק"ל וועם רבי יהושע לייב האט אזוי מחשיב געווען. וואס קדישזון האט געשריבן איז אז רבי מעשיל האט איינגעפירט די תפלות ביים מקום קדוש על פי המלצתו פון זיין רבי'ן רבי יהושע לייב זי"ע טראץ וואס אנדערע רבנים ובראשם הג"ר שמואל סאלאנט וואס האט געהאט די פאקטישע פירערשאפט אין שטאט איז געווען דערקעגן. די גאולה צו וואס רבי מעשיל האט געהאפט אז עס וועט קומען פון זיך עקשנען פאר שמירת תורה ומצוות בזרוע נטויה, איז דער זעלבער גאולה אויף וואס הגה"ק מסאטמאר זצ"ל האט מתפלל געווען.
צום שלוס ווילן מיר עצה'נען דעם אומאפהענגיקן צייטונג. אויב זיי ווילן זיין אזוי אויפגעכאפט ווי דער "כל העולם כולו" זאלן זיי אזוי גוט זיין און ווערן עכט אומאפהענגיק און נישט טשעפען מיט יעדן וואס גייט נישט מיט זיי אין שפאן, זעהט צו מאכן אייער צייטונג אינטרעסאנט און אנשטאט זיין פארנומען וועכנטליך מיט ציטירן "אפיקורסות" פון אזוינע שיינע אידישליכע צייטונגען ווי המודיע און דער אידישער וועלט, זאלן זיי אנהויבן סערווירן אלע היימישע אידיש רעדנדע קרייזן אן קיין ענגע פאליטישע היץ און שלום על ישראל.
