ויהי אחרי המבול: אנאליז אויפן פראטעסט היינט

די פון פאראויס געשאצטע 45 טויזענט אהרונים געפונען זיך שוין צוריק אין זייערע היימען, דער פריש געווארענער שר צבא ר' אהרן, איז שוין אויף וועג צוריק קיין קרית יואל, און די לופט אויף די גאס ווערט שוין אביסל אויסגעקלארט.
 
מ'האט שוין געוויזן פאר די וועלט ווי שטארק און מעכטיג מ'איז, אזש אז מ'קען צוזאמברענגן טויזענטער אידן פון איבער גרעיטער ניו יארק מיט א רייכע גאלעריע פון רבנים פון דעם ספינקער רבי ר' אביש, וועלכער איז א געשוואוירענער ידיד פאר ר' אהרן, און איז ערנסט גענומען געווארן אין באטראכט צו דינען אלס עדות נאך די פטירה פון ברך משה זי"ע אז ער האט געוואלט ר' אהרן פאר ממלא מקום; נאר פשוט צוליבן הרוצה לשקר ירחיק האט מען גענומען דעם חכם הארזים פון מאנטשעסטער. ביזן גאב"ד קאלסבורג, וועלכער האט זיך שוין מיט יארן צוריק אויך באטייליגט ביי א אהרונישע פראטעסט, נאר דאן האבן דאס ר' אהרן'ס בחורים אראנדזשירט קעגן אים זעלבסט.
 
מ'האט איינגעהאנדלט א קול קורא וואס האט אויפגעציטערט דאס לאנד ד' מאות פרסה על ד' מאות פרסה. מ'האט אפילו זוכה געווען אז ר' מלכיאל קאטלער האט נאך עספיעט מכחיש צו זיין אז זיין חתימה איז א בלויזע שמואל ווידער גניבה אקציע. און דערצו האבן רוב פון די אונטערגעשריבענע רבנים נישט געפונען פאר וויכטיג זיך צו באטייליגן ביי דעם פראטעסט.
 
אבער, דא קומט דער גרויסער אבער, דער דורכפאל איז אומבאשרייבליך! אייגענטליך וואס זאג איך אומבאשרייבליך?! עס איז קלאר יא באשרייבליך. נעמליך מ'גייט ארויסנעמען ווידעראמאל די באגאץ וואפן פון שאפע... לערנט אייך שוין אויס, ווען דער נושא הבאגאץ איז אויפן טיש זענען די אהרונים אויף גרויסע צרות עיין ערך פערמיט אויף די נייע שוהל.
 
הכלל נחזור לפראטעסט, דער שאקירענדער דורכפאל האט זיך שוין אנגעהויבן היינט צופרי ווען עס איז געקומען די נייעס איבער וואס עס קאכט זיך אין ארץ ישראל. די התאחדות הרבנים האט אין א דרינגענדע אסיפה באשלאסן אז איצט איז נישט די צייט צו ארויסגיין פראטעסטירן און האבן אפגערופן דעם מארגענדיגן פראטעסט אין וואשינגטאן. די רבנים האבן זיך געוואנדן צו ר' אהרן אז ער זאל אויך אפטרעטן פון זיין פראטעסט, אבער ר' אהרן בלייבט ר' אהרן, און ער האט גלייך פארשטאנען ברוב חכמתו אז די רבנים פארגינען אים פשוט נישט אז ער גייט האבן אזא סוקסעספול פראטעסט און צוליב דעם ווילן זיי ער זאל אפטרעטן, און דער בעבי האט אפגעווארפן די רבנים אז ער איז געקומען צו די החלטה אז ער גייט יא. דאס ווארפט א שטיקל ליכט פארוואס פון די אלע אונטערגעשריבענע רבנים האבן זיך בלויז די פעיראל דיינים באוויזן, און אה! פאר איך פארגעס אויך א פאפא באס איז געווען אויף די צענע.
 
א פרישע פאנטשער וואס האט זיך געשאפן היינט איז געווען די חתימה פון ר' מליכאל קאטלער ראש ישיבת בית המדרש גבוה, וועלכער איז לשיטת שמואל ווידער א געשוואוירענע מעריץ ומוקיר פון דעם וועלט בארימטן גאון ושקדן ר' אהרן טייטלבוים. ר' מלכיאל האט באקומען שטארקע פרעשור פון די אגודה קרייזן, וואו ער ווערט גערעכנט פאר איינע פון די פירער, אז ער זאל צוריקצוען פון זיין חתימה, ר' מלכיאל'ס אנטווארט איז געווען אז ער האט קיינמאל נישט אונטערגעשריבן פאר דעם פראטעסט, ער האט געשריבן אז עס איז דא א חובת מחאה אויף יעדן איד מוחה צו זיין אויף די חיטוטי שכבי וואס די ציונים ימ"ש פירן אצינד אדורך אין ארץ ישראל און גארנישט מער. די אגודה האט אבער גע'טענה'ט אז למעשה ווערט זיין בריוו גענוצט דורך די אהרונים פאר זייער פראטעסט אין מאנהעטן, אלזא זאל ער אנרופן ר' אהרן און בעטן ער זאל אפלייגן דעם פראטעסט אויף א צווייט מאל, אזוי ווי די התאחדות הרבנים האט געטוהן. פארשטייט זיך אז ר' מלכיאל האט פון ר' אהרן מער גארנישט געקענט ארויסרוקן, זיין חתימה איז שוין געווען פארשפרייט, די אהרונים זענען שוין געווען העפי, און ר' מלכיאל האט פארזוכט מיט א שעפ לעפל דעם טעם פון זיין א חבר טוב מיט ר' אהרן טייטלבוים.
 
דער פראטעסט גופא, איז ווי שוין דערמאנט געווען שטאטס ליצנות, די פאליציי שאצונג האט געזאגט אויף 35 טויזענט באטייליגטע מיט 2 יאנקעלע גליק'ס. ר' אהרן אליינס האט פארלוירן די מוט צו רעדן, ער איז געבליבן מיט די דרשה אין בויך, צום גרויס ווייטאג פון אלטוועטליכן אידענטום וואס האט אזוי ארויסגעקוקט אז ר' אהרן זאל זיך פריש נעמען רעדן ווי אין די גוטע צייטן, אבער ר' אהרן איז געבליבן זיצן בלאזענדיג ווי א בעבי, און דער קנעפל עפענונגס אקציע איז נישט צושטאנד געקומען.
 
דערווייל זענען נאך קיין פיקטשער'ס פון דעם גרויסארטיגן פראטעסט נישט נתפרסם געווארן, א זאך וואס ביי די אהרונים נעמט געווענדליך פינעף מינוט פון ווען א מאורע קומט פאר ביז ווילאנג די בילדער ליגן שוין ביי יעדן אידישן נייעס אגענטור איבער די גארער וועלט. און דאס זאגט גאר אסאך איבער דעם שטארקן סוקסעס וואס זיי האבן אפגעהאלטן היינט.
 
וואס דער בא'חנ'טער ר' אהרן כאפט אבער נישט איז אז, אקוראט דאס איז דער עונש פארן ארויסהאקן פון קאפ פון זיינע אקסן אז די חובת מחאה אנטקעגן די ציונים באלאנגט נאר פאר זיין קליינע ברודער דער עם הארץ, און נישט פאר אים גרויסע תלמוד חכם; ער קען נישט אין זיי אריינגארען אז ס'אסור צו גיין פראטעסטירן מיט די התאחדות הרבנים אנטקעגן די מדינה בלויז ווייל זיי האבן אים נישט אויפגענומען פאר נשיא, און אין א צייט שפעטער ווען זיין פאליטיק שפיל פארלאנגט אז ער מוז יא אהערשטעלן א פראטעסט זיי זאגן אז יא, יעצט איז דער צייט וואס מ'דארף די ציונים ווייזן, מ'קען נישט מיט בלויזע צעטליך אין די גאס איבערדרייען דעם געדאנקען גאנג פון די מיליאנען אקסן אז יעצט דארף מען יא גיין פראטעסטירן, נאכדערצו אז זיי האבן נישט געהערט א דרשה פונעם פי האתון זעלבטס, וועלכער איז באקאנט מיט זיין כאריזמע, און דאס וואלט אולי יא צוזאמגעברענגט די מאסן היינט. עס גייט נישט אזוי.
 
היינט מיט 11 יאר צוריק איז געווען זיין גרויסע נפילה, ח"י סיון תשנ"ט, אבער ר' אהרן איז געבליבן דער זעלבער! ער האט זיך נאך גארנישט געלערנט זינט דאן, אנגעהויבן פון זיך אומגיין מיט רבנים און גענדיגט ביים פארבלייבן דער גרויסער בעבי. כה לחי!