הודו לה': ביהמ"ד און ביה"ח אין שטאט סיגוט אפגעקויפט!

שטייענדיג שוין אפגערוקט בלויז צוויי וואכן פון די געהויבענע און היסטארישע נסיעה "אהיים קיין סיגוט", וואס מרן רבינו שליט"א וועט אי"ה אפרעכטן צו די הילולא קדישא פון זקינו מרן הגה"ק בעל קדשת יו"ט זי"ע, ווערט וואס א מאהל מער אויפגעוואכט דאס התעוררות פון תלמידי וחסידי סאטמאר צו האבן די גרויסע זכי' מיט צו האלטן אט דער הייליגע און גאהר היסטארשער נסיעה.

די פמליא נכבדה אין שפיץ פונעם רבי'ן שליט"א וועלן זיך אי"ה ארויסלאזן אויפ'ן וועג "אהיים קיין סיגוט" אי"ה דינסטאג נאכט פר' תרומה – כ"ז שבט און וועלן זיך צוריקקערן בעז"ה אום זונטאג פר' תצוה – ב' אדר א', אהיימברענגענדיג א סל מלא ברכות וישועות, און האפענדיג צו ערפולן שאיפת קדשו פון מרן מרן רבינו שליט"א אהערצושטעלן דעם פראיעקט לכבוד בית אבותיו הק'.

אין די קומענדיגע טעג – שפאנענדיג נענטער צו די געהויבענע מסע הקודש – וועלן מיר באריכטן די פונקטליכע פרטי הנסיעה.

הזמן קצר! נגידים ונדיבים בעם וואס ווילן זיך אנשליסן אינעם מסע הקודש און פאר אנדערע נסיעה-דעטאלן פארבינדט אייך ווי פאלגענד:

 אין אמעריקע מיטן טראוול-אגענט מוה"ר יצחק בער ווירצבערגער הי"ו אויפן נומער: 718.213.4595.

און אין אייראפע מיט מוה"ר שמואל מרדכי פריעדמאן הי"ו אויף 07974244445

 אדער מיט מוה"ר יואל שרייבער הי"ו אויף 07813754785.

-בעבור אבותינו שבטחו בך-

 ♦♦♦ 

♦♦♦

♦♦♦

אונטער'ן שאטן פונעם היסטארישן נסיעת הקודש לעיר האבות "סיגוט"

מיט גרויס התרגשות גרייט זיך דער גאנצער ציבור אנ"ש תושבי וויליאמסבורג און בארא פארק צום היי-יעריגן מעמד הדינער לטובת הישיבה ביום א' תרומה הבעל"ט, וואס טראגט דעם נאמען "מעמד המשכה לרבותינו אבותינו ודורותינו".

אז מ'מאכט א שטיקל סך הכל זעהט מען אז די הייליגע ישיבה צייכענט איצט אפ א צייט אפשניט פון גאנצע 62 יאר זינט די וועלט-בארימטע "ישיבה ומתיבתא תורה ויראה" איז נתייסד געווארן על אדמת אמעריקע דורכ'ן הייליגן מייסד הישיבה רבינו הקוה"ט רבן ומאורן של ישראל מרן בעל דברי יואל זי"ע, אבער ווירקליך איז די 'סאטמארער' ישיבה פיל פיל עלטער.

אונזער ישיבה איז א המשך צו די ישיבה וואס דער רבי בעל דברי יואל זי"ע זעלבסט האט נאך אנגעפירט מיט נאנט צו פערציג יאר אין דער אלטער היים, אנגעהויבן אין סאטמאר, שפעטער אין אורשיווא און אין קראלי, און נאך שפעטער צוריק אין סאטמאר, און עס איז א המשך צו די הייליגע 'סיגוטער ישיבה' וואס איז געפירט געווארן מדור אחר דור בקדושה של מעלה דורך רבוה"ק עצי התמרים זי"ע, וואס לא פסקה ישיבה מעל שולחנם כל הימים.

טאקע ביים איצטיגן מאמענט ווען מיר גרייטן זיך אלע צום היסטארישן מאמענט, מחדש צו זיין זיו אורה פונעם בית עלמין אין די שטאט סיגוט, און גלייכצייטיג צוריק צו באנייען דעם בארימטן הייליגן "הויף" אין די שטאט סיגוט, דאס ארט וואו די צדיקי בית סיגוט האבן אזויפיל יארן געפירט זייער עבודת הקודש און פון דארטן משפיע געווען תורה און קדושה פאר כלל ישראל, קומט פריש ארויף צום אויבערפלאך דעם אייגענארטיגער עבודת הקודש פון די סיגוטער גזע, וואס צוזאמען מיטן פירן די קהלה און די חסידים, האבן זיי זיך אפגעגעבן מיטן מדריך זיין די צעירי הצאן, בחורי חמד מופלגים, זייענדיג א זעלטענער מיזוג וואס מ'האט זעלטן געווען ביי צדיקים פון אנדערע גזעים.

שפעטער ווען דער רבי זי"ע איז אנגעקומען קיין ניו יארק, זייענדיג שבור ורצוץ פון די שרעקליכע איבערלעבענישן פון די צווייטע וועלט קריג, האט ער זיך אנגעגארגעלט מיט א כח הקדושה, און ממשיך געווען דעם כח התורה ביים גרינדן די הייליגע סאטמארער ישיבה, אלעס נאר צוליב דעם, זעענדיג אין די ישיבה הק' די "המשכה" פאר די קומענדיגע דורות עד ביאת הגואל. די ישיבה איז אלץ געשטאנען אויפ'ן סאמען העכסטן שפיץ בראש מעינותיו פון דעם צדיק הדורות, ובדרכיו איז געגאנגען ממשיך דרכו בקודש מרן רביה"ק בעל ברך משה זי"ע, וואס טראץ זייענדיג מוקף בחבילי טירדין מיט אזויפיל עניני הכלל והפרט, האט דער רבי זצ"ל אלץ געטראכט און נישט מסיח דעת געווען פון די הייליגע ישיבה.

וכהיום יום ווען דער מנהיג העדה גאון עוזינו  מרן רבינו שליט"א איז ווייטער ממשיך בהנהגת העדה  איז דער רבי שליט"א ווייטער מקושר צו די הייליגע ישיבה כדרכי אבוה"ק, וכאשר הוא באמנה אתו פון די לעצטע אריבער דרייסיג יאר אלס ראש הישיבה, און ווי דער רבי שליט"א דרוקט זיך כסדר אויס "די ישיבה הקדושה איז 'בתוכי ובלבבי' לפרוש ממנה אי אפשר"!

אזוי ארום איז די ישיבה הק' ריכטיג די "המשכה" סיי פון "רבותינו" און סיי פון "אבותינו" זייענדיג די זעלבע ישיבה וואס די סיגוטער צדיקים האבן געפירט אין סיגוט, וואס דער רבי בעל דברי יואל זי"ע האט געפירט במקומות משובותיו, וואס דער בעל ברך משה זי"ע האט געפירט אין זענטא, און וואס רבוה"ק האבן געפירט און פירן ווייטער דאהי, און די ישיבה וואו די עלטערן און אור עלטערן זענען נתחנך און נתגדל געווארן במשך די אלע יארן.

דערפאר הערשט איצט א זעלטענעם התרגשות ביים גאנצן ציבור צו קומען מחזק זיין די הייליגע ישיבה צו קענען ווייטער ממשיך זיין די הייליגע קייט פון הרבצת התורה, מעמיד צו זיין די צוקונפטיגע גדולי תורה, רבנים, מורי הוראה, כלי קודש, פאר אונזער אייגענע קינדער און אייניקלעך.

-עלינו ועל בנינו ועל דורותינו- 

♦♦♦ 

♦♦♦

אין די טעג ווען עס ווערן געמאכט די לעצטע הכנות צו די גרויסארטיגע מסע הקודש "בעבור אבותינו" איז פארהאן די לעצטע געלגנהייט פאר אנ"ש צו האבן די מעגליכקייט צו נעמען א חלק אין די געהויבענע נסיעה.

נאכדעם וואס א גרויסער ציבור האט אויסגעדרוקט זייער השתוקקות צו קענען אנטייל נעמען אין אט דער היסטארישער נסיעה, האט דער וועד הנסיעה פראקלימירט א גורל אין יעדע לאקאלע צענטער ווי פאר 100 דאלאר למען בניית האוהל הק' אין סיגוט קען מען אריינגיין אין א גורל צו קענען מיטפארן מיט'ן רבי'ן שליט"א.

אין בארא פארק איז דער געווינער פונעם ערשטן גורל געווען ר' בערל מייזעלס הי"ו.

דער וועד הנסיעה צייגט אהן אז אזוי ווי א גרעסער צאהל מיטפארער האבן זיך געמאלדן די לעצטע פאר טעג, זענען די פלעצער באגרעניצט ואון מ'וועט נישט קענען מאכן צופיל גורלות.

דער גראנדיעזער מעמד "המשכה" אנטשפרעכט צו זיין גאר א גייסטרייכער, ובפרט ווען דער מעמד ווערט קאמבאנירט צוזאמען מיט א מעמד "צאתכם לשלום" איידער דער רבי שליט"א לאזט זיך ארויס אויף די היסטארישע נסיעה "אהיים קיין סיגוט", פוקד צו זיין מקום מנוחת אבותיו הק' זי"ע, ובראשם ביים ציון המצוינית פון זקינו הגה"ק בעל קדושת יום טוב זי"ע לרגל די יומא דהילולא וואס געפאלט אויס כ"ט שבט, דאנערשטאג פרשת תרומה הבעעל"ט.

דער רבי שליט"א פארט אי"ה ארויס פון ניו יארק א קורצע צייט נאכן מעמד הדינער, און דער גרויסארטיגער מעמד וועט זיין קאמבאנירט מיטן גרויסן מעמד "צאתכם לשלום" לכבודו פונעם רבי'ן שליט"א ופמליותו.

לרגל די היסטארישע מאורע וועט א קבוצה חשוב'ע מצוייני תלמידי הישיבה זיך געזעגענען מיט'ן רבי'ן שליט"א מיט א 'קשיא' אויף די סוגיא וואס מ'לערנט יעצט אדורך אין די ישיבה, ווי עס איז דער סדר פונעם רבי'ן שליט"א, אזוי ארום אנצוהאלטן א קשר עליון דאורייתא מריחוק מקום ומקירוב הלב.

ביים דינער וועט מען אי"ה באריכטן איבער די בעפארשטייענדע נסיעה און פרטים פון די העפטיגע רענאוואציע ארבעט וואס איז דורכגעפירט געווארן אינעם בית עלמין אין די שטאט סיגוט, ווי אויך איבערן אפקויף פונעם שול הויף אין סיגוט א.א.וו.

גלייכצייטיג וועט ביים דינער זיין א געהויבענע געלעגענהייט צו קענען שרייבן "קוויטלעך" וואס דער רבי שליט"א וועט מיטנעמען מיט זיך, דאס פארצוליינען אינעם אוהל הקדוש פון זקיניו הק' זי"ע.

ביים מעמד וועט אויפטרעטן דער בארימטער ידען בקורות בחצרות סיגוט-סאטמאר הרה"ג פה מפיק מרגליות ר' יעקב ווייס שליט"א ר"מ פאפא, וועלכער וועט איבערגעבן פארשידענע אינטרעסאנטע היסטארישע פרטים איבער די הייליגע גזע העצי התמרים זי"ע און "מה נורא המקום הזה" פונעם אוהל הק' און די היסטארישע שוהל-הויף וכדו'.

דער התרגשות'דיגער מעמד וועט באגלייט ווערן דורך די בארימטע 'סאטמארער קאפעליע' וועלכע וועלן פארזינגן ניגוני התעוררות לרגל הנסיעה לקברי צדיקים.

נאכן גרויסן מעמד וועט דער גאנצער ציבור האבן די געלעגענהייט דורכצוגיין ביים רבי'ן שליט"א זיך צו געזעגענען איידער דער רבי שליט"א לאזט זיך ארויס אויף די נסיעה לקברי צדיקים, און מקבל צו זיין מברכת קדשו.

-כי מלאכיו יצוה לך לשמרך בכל דרכיך- 

♦♦♦

וואס א טאג נענטער צום דינער מעמד "המשכה" ומעמד " צאתכם לשלום" הערט מען מער צוריק די גוטע גריסן מבין כותלי היכלי המתיבתא, מיט וואס דער ברייטער ציבור אנ"ש ווערן נענטער באקענט, דורך די געטרייע עסקנים, וועלכע באזוכן טעגליך ביים ציבור אין בעפארברייטונג צום דינער למען החזקת הישיבות.

ביי די באזוכן פרעזענטירן די עסקנים פאר'ן ציבור דעם ספעציעלן "נחת פעקל" דורך וועלכן דער ציבור באקומט ארויס א קלאר בילד איבערן הלך ילך אין די היכלי הישיבות, און דעם גענויעם ציפער פון תלמידי הישיבות וועלכע גרייטן זיך אין די קומענדיגע חדשים זיך צו שטעלן צום פארהער אויף גאנצע מקצועות התורה.

הערענדיג דעם באריכט איבער די ישיבות הקדושות, געניסט דער ציבור פון שעות של קורת רוח, דערזעענדיג זיך מיט קלארע פאקטן ווי שטארק די ישיבות זענען געשטיגן הן בכמות והן באיכות אין די לעצטע יארן, ובפרט זינט מען האט פריש איינגעטיילט די ישיבות אויף באזונדערע אפטיילונגען, וואס דאס גיט די בעסטע מעגליכקייטן פאר יעדן תלמיד הישיבה צו שטייגן דרגות רמות, און מ'זעט ב"ה ווי די ארבעט האט אזוי גינסטיג נושא פירות געווען צו הייבן די ישיבה אויף אזא הויכע דרגה, ווען כהיום יום איז די מתיבתא הקדושה א מעכטיגע תורה פאבריק וואו עס ווערן דורכגעטוען רוב מקצועות התורה, און דערפאר שפירט זיך א שטארקע זכי' ביים ציבור צו ווערן שותפים אין אזא בית היוצר און האבן א חלק אינעם לעכטיגן עתיד עלינו ועל בנינו ועל דורותינו.

די הנהלת הישיבה קוקט דאס יאר שטארק ארויס אויף די ווארימע שטיצע פונעם ברייטן ציבור, ובפרט שטייענדיג אצינד בשנת העיבור ווען עס איז נאך א חודש ווען עס פארבלייבט א דעפיציט נאך אלע הכנסות וואס איז דא, וואס איז אין צוגאב צו דעם דראסטישן געהעכערטן בודזשעט פון די ישיבה, פאר וועלכן עס פארלאנגט זיך זה לעומת זה א דראסטישע העכערונג אין די נדבות פונעם ציבור.

בעיקר זעהט זיך אן היי-יאר א שטארקע באוועגונג ביים ציבור צו נעמען אנטייל און אפקויפן דעם מינימאלן זכות "קונה עולמו בשעה" פאר 576$ לשנה - 48$ לחודש, וואס מיט דעם קויפט אפ דער נדבן 2 שעה א טאג אין ישיבה, וואס באטרעפט ס"ה 1,400 שעה לימוד התורה, עבודה וגמ"ח פון 700 בחורי חמד כ"י. דער נדבן קען זיך אויסקלויבן וועלכע טאג מען זאל מזכיר זיין א נאמען לזכות אדער לע"נ וכדו'.

איבריג צו זאגן וואס ס'מיינט אפילו "איין" שעה פון א בחור אין די ישיבה, וויפיל קנינים תורה, עבודה וגמ"ח, וואס אט די איינע שעה איז דער סאמע יסוד פאר'ן גאנצן לעבן און פאר די ווייטערדיגע דורות, כש"כ ווען מ'האט א חלק אין אסאך מער שעות, וואס ווי גרויס איז דער זכות.

עס איז טאקע צו ערווארטן אויף ווייטער אז דער גאנצער ציבור וועט באגרייפן וואספארא גאלדענע זכי' עס ליגט אונז פאר די הענט און שפירן פאר א פליכט כאטש זיך איינצוהאנדלן די מינימאלע זכותים און אזוי ארום העלפן אויפהאלטן די ריזיגע תורה פאבריק פאר אונזער אייגענע המשכה.

-עשה למענך אם לא למענינו-

 ♦♦♦

קוויטלעך וועט מען קענען איבערגעבן גלייך נאכן מעמד לידיו פון מרן רבינו שליט"א

דער היי-יעריגער דינער לטובת הישיבה גדולה איז א קאמבאנאציע פון עטליכע כנסיות וואס יעדע איינע פאר זיך איז כדאי לעצמו צונויפצוברענגן א מאסיווער שטראם פון אלפי חסידי סאטמאר תושבי ברוקלין רבתי.

פון די הויכפונקטן אינעם יום הישיבות וועט זיין דער מעמד "צאתכם לשלום" ארויסצובאגלייטן דעם מנהיג העדה מרן רבינו שליט"א איידער דער רבי שליט"א לאזט זיך ארויס אויף די נסיעה פוקד צו זיין מקום מנוחת אבותיו הקדושים זי"ע וואס ליגן באהאלטן אינעם עיר האבות סיגוט יצ"ו, לרגל יומא דהילולא קדישא פון זקינו מרן הגה"ק בעל קדושת יום טוב זי"ע.

 זייענדיג בלויז געציילטע טעג איידער דער רבי שליט"א לאזט זיך ארויס אויף די נסיעה, איז דא א שטארקע אינטרעסע ביים  ציבור צו קענען איבערגעבן קוויטלעך פארן רבי'ן שליט"א, וואס דער  רבי זאל פארליינען אינעם הייליגן אוהל מקום מנוחתם פון די קדושי עליון זקיניו צדיקי בית סיגוט לדורותיהם זי"ע וועלכע האבן כל ימי חייהם גע'פועל'ט ישועות פאר אידישע קינדער, ובמותם לא נפרדו איז דער אוהל הקדוש אין סיגוט גוט באקאנט ביז צום היינטיגן טאג אלס מקום קדוש וואו אידן זענען הפלא'דיגע ענינים להוושע בכל עניניהם לטובה.

לכבוד דעם גרויסן מעמד וועלן די משמשים בקודש בבית כ"ק אדמו"ר שליט"א וואס שרייבן קוויטלעך, זיצן אויף א ספעציעלן ארט אינעם ראז קעסיל זאל, וואו מען וועט קענען שרייבן קוויטלעך, און נאכן גרויסן מעמד וועט זיין א ספעציעלע געלעגענהייט דורכצוגיין כבני מרון מקבל צו זיין מברכת צדיק בברכת פרידה, און דערביי איבערצוגעבן די קוויטלעך לידיו פון רבי'ן שליט"א.

די קוויטל שרייבער וועלן זיצן אויף זייער ארט אין זאל במשך דעם גאנצן מעמד, און עס איז ראטזאם צוצוקומען צום טישל וואס פריער, כדי צו פארמיידן לענגערע שורות.

 ♦♦♦ 

ספעציעלע "נסיעה גורל" וועט געצויגן ווערן פאר אלע משתתפים מיטן סכום פון 250$ אויפן ארט 

משתתפים וועלן אריינגיין אין גורל צו קענען מיטהאלטן נסיעה צוזאמען מיטן רבי'ן שליט"א

אין א קאמבינאציע פונעם "יום הישיבות" מיטן מעמד "צאתכם לשלום" וועט ביים גרויסארטיגן מעמד המשכה געצויגן ווערן א ספעציעלער גורל מיט וועלכע דער זוכה בגורל וועט אי"ה האבן די מעגליכקייט מיטצוהאלטן דעם מסע הקודש "בעבור אבותינו" צום עיר האבות סיגוט.

ווי אלע יארן ביז היינט ווערט דער גרויסארטיגער מעמד ספעציעל פאררופען כדי צו שאפן די פאנטאסטישע סכומים אין וועלכע די הנהלת הישיבה נויטיגט זיך צו קענען אנגיין מיט די הייליגע ארבעט. ספעציעל נויטיגט זיך די הנהלת הישיבה אין גרעסערע סכומים "קעש אויפן פלאץ" וואס פעלט זיך קריטיש וויכטיג אויס פאר די טאג-טעגליכע הוצאות פון אנפירן אזעלכע מאסיווע פראיעקטן ווי די היכלי הישיבה גדולה אין קרית יואל.

כדי מזרז צו זיין דעם ציבור מיטצוברענגן וואס מער "קעש אויפן פלאץ" איז דאס יאר ווייטער פראקלאמירט געווארן די גרויסארטיגע קעש גורלות, ווי באזונדער באריכטעט, אבער דאס יאר איז צוגעקומען דער ספעציעלער "הויפט-געווינס" א גורל אויף א טיקעט קיין רומעניע מיטצוהאלטן דעם מסע הקודש.

אלע וואס וועלן זיך באשטייערן מיטן סכום פון 250$ ביים מעמד הדינער, וועלן אי"ה אריינגיין אינעם גרויסארטיגן "נסיעה גורל". דער גורל  וועט געצויגן ווערן תיכף נאכן מעמד הדינער, און דער גליקליכער זוכה בגורל וועט תיכף נאכן מעמד קענען זיך אנהייבן רישן אויף די נסיעה, זיך ארויסצולאזן אויפן וועג אינאיינעם מיט די פילע מיטרייזענדע ובראשם דער רבי שליט"א.

 ♦♦♦