שפעהט אויפדערנאכט נאכ'ן געזעגענען דעם ציבור אנשי שלומינו זענען געקומען אויף א באזוך צו מרן רבינו שליט"א גדולי הרבנים ומנהיגי העדות שליט"א, כ"ק אדמו"ר מ'סקולען שליט"א, האדמו"ר מ'וויען שליט"א, הגאון ר' מלכיאל קאטלער שליט"א ראש ישיבת ביהמ"ד גבוה ד'לעיקוואד און הגאון ר' מתתי' סאלאמאן שליט"א משגיח ביהמ"ד גבוה ד'לעיקוואד, וועלכע זענען געקומען איבערשמועסן פרטים בנוגע דעם גרויסן כינוס כלל ישראל וואס איז געפלאנט אויף דעם קומענדיגן כ"ח אייר הבעל"ט אינעם גיגאנטישן סיטי פיעלד סטעידיום אין קווינס.
דער רבי שליט"א האט גאר ווארים אויפגענומען די חשובע דעלעגאציע, און דערביי האט מען דן געווען בכובד ראש בנוגע די מלחמה קעגן די סכנה פון טעכנעלאגיע, א סכנה וועלכע נעמט אריין אלע שיכטן און קרייזן פון כלל ישראל, און עס איז ארויסגעהויבן געווארן די התעוררות וואס הערשט ב"ה ביי אלע קהילות בישראל, און אזוי אויך איבער די פעולות בקרב קהילתינו הקדושה בעבר בהוה ובעתיד, און עס איז אויסגעשמועסט געווארן די וויכטיגקייט אנצוגיין מיט א פאראייניגטע כח פון רבני ומנהיגי ישראל למען קדושתן של ישראל.
בנוגע דעם ענין השתתפות פון אנשי שלומינו תלמידי וחסידי סאטמאר ביים געפאלנטן כינוס כלל ישראל, האט דער רבי שליט"א פארגעשטעלט פאר די חשובע רבנים שליט"א דעם שטעלונג דערוועגן מפי ספרים וסופרים ועל דרך אבותינו ורבותינו הקדושים, און צווישן אנדערע איז אויפגעברענגט געווארן א פלאן פון צוטיילן די אסיפה אויף עטליכע באזונדע אסיפות, וואס דער רבי שליט"א האט גאר שטארק משבח געווען דעם פלאן וואס וועט ערמעגליכן דאס השתתפות פון תלמידי וחסידי סאטמאר, און אזוי איז פארפירט געווארן א לענגערע שמועס איבער די פרטי הדברים פונעם געפלאנטן כינוס און פון אונזערע יסודות און פרינציפן וואס יסודתם בהררי קודש, און נאך א לענגערע שיחת תלמידי חכמים איז אויפגענומען געווארן דער עומק הענין מיט א פארשטענדעניש און א קלארקייט דורך די גדולי הרבנים שליט"א.
דערנאך האט דער רבי שליט"א געהייסן אריינברענגען כיבוד לכבוד די רבנים שליט"א, און דער סקולענער רבי שליט"א האט א לענגערע צייט מאריך געווען בברכותיו פאר מרן רבינו שליט"א ממשיך צו זיין מיט די שטארקע פעולות לטובה און דערויף האט דער רבי שליט"א מאציל געווען ברכת קדשו פאר די רבנים הנאספים שליט"א אז זיי זאלן זעהן פול הצלחה אין די אנגייענדע פעולות להגדיל תורה ולהאדירה, און צו קענען באהיטן דאס כלל ישראל פון די ביטערע נסיונות.
און דערנאך האט דער רבי שליט"א ארויסבאגלייט די רבנים שליט"א ביז צו די אויטא.
•♦•
