מיינע הערות פאר קרעמערס נייעס סטאנציע

אידישע נייעס

דער פאליציי שעף אין סיאטעל וואשינגטאן האט אויסגערימט די העארישע אקציע פון א אידישע פרוי וועלכע איז דעם פארגאנגענעם פרייטאג געשאסן און פארוואונדעט געווארן דורך דעם אראבישן טעראריסט אין די פעדערעישאן געביידע, און האט באוויזן צוצוקריכן – טראץ די שווערע וואונדן – צו איר אפיס און אויפהייבן א טעלעפאן, פון וואו זי האט גערופן 911, און אפילו ווען דער מערדער איז אריינגעקומען און איר געהייסן אראפלייגן דעם טעלעפאן, האט זי זיך נישט דערשראקן, נאר איבערגעגעבן פאר די פאליציי אלעס וואס איז דארט פארגעגאנגען ביים שיסעריי.

שפעטער האט זי איבערצייגט דעם שיסער אליין אז ער זאל קומען צום טעלעפאן, ער האט גערעדט מיטן פאליצייאישן דיספעטשער א קורצע וויילע, פארלאנגענדיג אז אמעריקע זאל ארויסציען אירע טרופן פון איראק און זאגנדיג אז אמעריקע באהאנדעלט שלעכט די מוסולמענער איבער די וועלט.

דאן איז געלונגען פאר די פאליציי אים איבערצורעדן אז ער זאל אויפגעבן זיין קאמף, אראפלייגן דעם רעוואלווער, און ארויסקומען פון די בילדינג מיט די הענט אין דער הייך. ער האט טאקע אזוי געטאן, און איז יעצט ארעסטירט אויף פופציג מיליאן דאלער בעיל.

**

עס איז באקאנט געווארן אז דער מערדער האט זיך אריינבאקומען אין די געביידע דורכן נעמען א דרייצן יעריג קינד פאר א משכון. ער האט זיך באהאלטן צווישן ביימער אינדרויסן פון די בילדינג, און ווען דאס קינד האט געוואלט אריינגיין, האט ער צוגעלייגט א רעוואלווער צו איר קאפ און געצווינגען אים אריינצולאזן אין די פארשלאסענע געביידע, דאס קינד איז ארויס אומבאשעדיגט.

**

נייעס פון מיטל מזרח

מדינת ישראל קריגס עראפלאנען האבן די נאכט אדורכגעפירט א בלוטיגע אטאקע אויפן שטעטל "קאַנאַ" אין דרום לבנון, שיסנדיג מיסילס אויף עטליכע געביידעס וואו מענטשן זענען געשלאפן, אומברענגנדיג איבער 56 ציווילע, אריינגערעכנט 34 קינדער.

א ווארטזאגער פאר די איזראעלישע ארמיי האט געזאגט אז פון יענע געגענט פלעגן ארויסגעשאסן ווערן אסאך פון די ראקעטן וועלכע האבן געלאנדעט אין די צפון געגענטער פון מדינת ישראל. אויך האט ער געזאגט אז מען האט באצייטנס געווארנט די איינוואוינער פונעם שטעטל צו פארלאזן זייערע היימען בעפאר די באמבערדירונג.

גלייך נאך די אטאקע, האט די לעבאנעזער רעגירונג געבעטן פון סעקרעטערי אוו סטעיט רייס וועלכע האט פלאנירט צו באזוכן ביירוט היינט זונטאג, אז זי זאל נישט קומען, ווייל לבנון איז נישט אינטערסירט אין קיין שום קעגנזייטיגע פארהאנדלונגען, נאר אין א זאפארטיגע פייער אפשטעל מצד מדינת ישראל.

**

טויזנטער אויפגעברויזטע לעבאנעזער האבן נאך די אטאקע געשטורעמט די יו.ען. הויפטקווארטיר אין לבנון, וואו זיי האבן צובראכן די פענסטער פון די געביידע און צושטערט אלע אפיסעס, שרייענדיג "טויט צו מדינת ישראל, טויט צו אמעריקע".

וועלט פירער האבן שארף פארדאמט די אטאקע אין "קאנא", פראנקרייכ'ס פרעזידענט דזשאק שיראק האט געזאגט אז דאס איז געווען אן אומבארעכטיגטע אטאקע אקעגן ציווילע, און ירדן'ס קעניג אבדולא האט געזאגט אז מדינת ישראל האט מיט דעם צושטערט אלע אונטערנאציאנאלע געזעצן.

חיזבאלא און כאמאס האבן ביידע פארשפראכן נקמה צו נעמען אין מדינת ישראל צוליב די ברוטאלע אטאקע וואס זיי האבן אדורכגעפירט אין קאַנאַ.

**

נעכטן, שבת, האבן מדינת ישראל עראפלאנען באמבערדירט דעם שטעטל "נאַבּאַטיע" אין לבנון, אומווארפנדיג א הויז און אומברענגענדיג זיבן מיטגלידער פון איין משפחה.

צוויי יו.ען. שלום-היטער זענען פארוואונדעט געווארן פון א איזראעלישע לופט אטאקע אין דרום לבנון, בלויז איין וואך נאכדעם וואס פיר אנדערע שלום-היטער זענען אומגעקומען דורך די איזראעלישע לופט כוחות.

**

פינעף מענטשן זענען היינט פארוואונדעט געווארן אין מדינת ישראל פון די אנגייענדע ראקעטן אטאקעס אין צפול טייל פון לאנד.

איבער הונדערט ראקעטן זענען היינט געפאלן אויף די געגענטער נהריה, קרית שמונה, צפת, עכו, טבריא און נעבן מעלות, מערסטענסטייל זענען זיי געפאלן אויף אפענע אומבאוואוינטע געגענטער.

**

דיפלאמאטן איבער די וועלט זאגן אז די בלוטיגע אטאקע וואס מדינת ישראל האט די נאכט אדורכגעפירט אין לבנון, וועט אפשטופן די פארהאנדלונגען אינעם יו.ען., וואו עס האט לויטן פלאן געברויכט אדורכגעפירט ווערן א רעזאלוציע דעם מאנטאג אדער דינסטאג רופנדיג פאר א פייער אפשטעל און העלפן ענדיגן די שלאכטן דורך אריינשטעלן אונטערנאציאנאלע שלום-היטער טרופן צו באוואכן דעם ראיאן.

**

וועלטליכע נייעס

א קאר וואס איז געווען אנגעפולט מיט אויפרייס מאטעריאל האט נעכטן נאכט אויפגעריסן נעבן די אמעריקאנע קאנסולאט אין קירקוק, איראק, אומברענגענדיג צוויי איראקער און פארוואונדענדיג זיבן אנדערע. קיין שום אמעריקאנער זענען נישט געשעדיגט געווארן פונעם אויפרייס.

דאס איז געווען די זיבעטע קאר באמבע אויפצורייסן אין קירקוק, וואו די אראבער און די קורדן פארמעסטן זיך ווער עס זאל האבן קאנטראל אויף די רייכע אוצרות פון אויל וואס געפונען זיך אין יענעם געגענט.

**

וויילנדיג אין איראן אויף א צוויי טאגיגן באזוך, האט ווענעזועלא'ס פרעזידענט יוגאָ שאַוועז פארשפראכן צו שטיין צו הילף פאר איראן אין איר קאמף אקעגן אמעריקע.

דער איראנער פרעזידענט האט אויך פארשפראכן ארויסצוהעלפן ווענעזועלא אויפצובויען א נייע פייפליין פאר אויל, די צוויי לענדער זענען פון די גרעסטע אויל פראדוצירער אין די וועלט, און זענען ביידע אויסגעשפראכענע פיינט פאר אמעריקע.

**

אמעריקאנער און אפגאנער זיכערהייט קרעפטן האבן נעכטן אדורכגעפירט א געלונגענע אטאקע אויף טאליבאנער מיליטאנטן, אומברענגענדיג 20 טאליבאנער, און צושטערנדיג אן אנפאל וואס די טאליבאנער האבן פלאנירט אדורכצופירן אין דרום אפגאניסטאן.

פארגאנגענעם פרייטאג זענען 18 טאליבאנער און 4 אפגאנער פאליציאנטן אומגעקומען ביי שלאכטן צווישן די קעגנזייטיגע גרופעס.

לויטן פלאן וועלן נאַט"אָ קרעפטן מארגן איבערנעמען קאנטראל אויף די פראווינצן פון דרום אפגאניסטאן.

**

אמעריקאנע נייעס

קאנגרעס האט נעכטן אדורכגעפירט א ביל, העכערנדיג דעם מינימום וועידזש צום ערשטן מאל אין צען יאר.

די ביל, וואס איז אדורכגעפירט געווארן מיט א מערהייט פון 230 אקעגן 180 קאנגרעסלייט, וועט העכערן דעם מינימום געהאלט פאר אמעריקאנער ארבייטער, פון פינעף דאלער מיט פופצען צענט א שעה, ביז זיבן דאלער מיט פינעף און צוואנציג צענט א שעה, די העכערונג וועט צושטאנד קומען אין לויף פון דריי יאר.

די רעפובליקאנער אין קאנגרעס האבן אדורכגעפירט דעם געזעץ אינאיינעם מיט א צווייטע געזעץ, וואס וועט שטארק שניידן די שטייער וואס יורשים פון רייכע פארמעגענס דארפן באצאלן פאר די רעגירונג.

די ביל גייט יעצט צום סענאט, וואו עס וועט אויפגענומען ווערן מיט שטורמישע דעבאטעס פון ביידע פארטייען, צוליב די האקעלקייט פון די צוויי געזעצן.

**

זעקס מענטשן זענען געשאסן געווארן צום טויט אין די גאסן פון ניו ארליענס אין די פארגאנגענע 24 שעה, ברענגנדיג זארג אז דאס וועט שטארק אפעקטירן די שטאט וואס מוטשעט זיך שווער זיך צוריקצושטעלן אויף די פיס זינט זי איז חרוב געווארן דורך האריקעין קאטרינע מיט א יאר צוריק.

**

ביזנעס נייעס

די סטאק מארקעט האט פאריגע וואך געהאט גאר א געשמאקע וואך, שטייגענדיג אין איין וואך איבער דריי פראצענט, די גרעסטע וואוקס אין איין וואך אין איבער א יאר צייט.

פרייטאג אליין איז די דאו דזשאונס געשטיגן מיט 119 פונקטן, צוליב האפענונג אז די פעדעראלע רעזערוו וועט מער נישט העכערן די אינטערעסט ראטעס.

**

לאקאלע נייעס

וועטער עקספערטן זאגן פאר א היץ כוואליע וואס וועט באטרעפן די ניו יארקער אומגעגענט אין די קומענדיגע פאר טעג, ווען די טעמפרעטוארן וועלן דערגרייכן אין די הויכע ניינציגער, און מיט די יומידעטי וועט זיך עס שפירן ווי איבער הונדערט דעגרי.

די הייסע וועטערס האבן זיך שוין אנגעהויבן נעכטן שבת קודש, און ווערן ערווארטעט אנצוהאלטן ביז מיטוואך ערב תשעה באב.

אזוי ווי די טעג קען מען זיך נישט אפקילן אין סווימינג פול וכדומה, זאלן מענטשן מער אכט געבן אויפן געזונט, און זיך דרייען ווי ווייניגער אויף די גאסן, מען זאל טרונקן אסאך וואסער, אפילו אויב מען שפירט זיך נישט דורשטיג.

**

קאן עדיסאן האט שוין ווידער געברויכט ארבעטן שווער צוריקצושטעלן די עלעקטריסיטי אין סטעטן איילענד, צום דריטן טאג אין א רייע, נאכדעם וואס פינעף טויזענט קאסטומערס האבן פארלוירן די עלעקטרישע קראפט, צוליב די שווערע רעגנס פונעם פארגאנגענעם פרייטאג נאכמיטאג וועלכע האבן אומגעווארפן עלעקטרישע זוילן.

עס איז צום האפן אז די היץ כוואליע וואס ווערט ערווארטעט די וואך, וועט נישט פאראורזאכן מערערע בלעקאוטס דורכאויס ניו יארק סיטי, צוליב די איבערפלוס פון עירקאנדישן באנוצער אין די גאר הייסע וועטערס.

**

אין אנדערע נייעס

בוי ארבייטער אין קווינס האבן דעם פארגאנגענעם פרייטאג געהאלטן אינמיטן לייגן דעם פאנדעישן פאר א דריי שטאקיגע געביידע, ווען די וואנט פון א דערנעבנדיגע גאראדזש איז צוזאמגעפאלן אויף די בילדינג, איין ארבייטער איז אומגעקומען און דער אנדערער איז פארוואונדעט געווארן.

**